وفاقی وزیر انجینئر امیر مقام سے کشمیر کونسل کے ممبران کی ملاقات،کشمیر کونسل سے متعلق امور، ترقیاتی منصوبوں اور لوگوں کو درپیش مسائل پر تبادلہ خیال

اسلام آباد۔23اپریل (اے پی پی):وفاقی وزیر برائے امور کشمیر و گلگت بلتستان وسیفران انجینئر امیر مقام سے کشمیر کونسل کے ممبران نے اسلام آباد میں ملاقات کی۔کشمیر کونسل کے وفد میں خواجہ طارق سعید ایڈوکیٹ ، شجاع راٹھور، یونس میراور حنیف ملک شامل تھے۔

کونسل ممبران نے انجینئر امیر مقام کو وفاقی وزیر برائے امور کشمیر و گلگت بلتستان کا چارج سنبھالنے پر مبارکباد دی۔کشمیر کونسل کے ممبران نے وزیر امور کشمیر و گلگت بلتستان کوپھولوں کا گلدستہ بھی پیش کیا۔ملاقات کے دوران کشمیر کونسل سے متعلق امور، ترقیاتی منصوبوں اور لوگوں کو درپیش مسائل پر تفصیلی تبادلہ خیال کیا گیا۔

وفاقی وزیر انجنیئر امیر مقام نے وفدکے ساتھ گفتگو کرتے ہوئے کہا کہ وزارت امور کشمیر و گلگت بلتستان علاقے کے لوگوں کو درپیش مسائل کے حل کے لیے ہر ممکن تعاون جاری رکھے گی،وفاق اور آزاد جموں کشمیر حکومت کے درمیان ورکنگ ریلیشن شپ کو مزید بہتر بنایا جائے گا۔