صدر مملکت آصف زرداری اور وزیراعظم شہباز شریف نے کہا ہے کہ عالمی یوم امن کے موقع پر اقوامِ عالم کے مابین امن کے اصولوں کے ساتھ اپنی وابستگی کا اعادہ کرتے ہیں۔
عالمی یوم امن کے موقع پر اپنے پیغام میں انہوں نے کہا کہ ہم سب کو اقوامِ عالم کے مابین امن، رواداری اور بقائے باہمی کے کلچر کو فروغ دینا ہے، آج دنیا کو مختلف علاقوں میں جغرافیائی سیاسی کشیدگی اور تنازعات کا سامنا ہے، تنازعات عالمی امن کو خطرے میں ڈال رہے ہیں۔
پاکستان مخالف قوتیں دہشتگردی کی حمایت اور خفیہ مالی معاونت کر رہی ہیں ، صدر زرداری
صدر آصف زرداری نے کہا کہ اسرائیل نے فلسطین میں دہشتگردی کا بازار گرم کر رکھا ہے، اسرائیل ہزاروں لوگوں کے غزہ میں قتل عام سے فلسطینیوں کی نسل کشی کر رہا ہے، ہندوتوا سے متاثر مودی حکومت مقبوضہ کشمیر میں سنگین انسانی حقوق کی خلاف ورزیاں کر رہی ہے
وزیر اعظم شہباز شریف نے اپنے پیغام میں کہا کہ آج کے دن کے موقع پر حکومت اور عوام جنگ و تنازعات سے پاک پرامن دنیا کے فروغ کیلئے عالمی برادری کے شانہ بشانہ کھڑی ہے۔
شہباز شریف نے کہا کہ آج کی دنیا بے شمار تنازعات کے باعث تقسیم کا شکار ہے، ہمیں اقوام عالم کے مابین اختلافات کو ختم کرنے اور امن کے لیے مشترکہ حکمت عملی اپنانے کی ضرورت ہے۔
ملک میں دہشتگردی کے مکمل خاتمے تک جنگ جاری رکھیں گے، شہباز شریف
انہوں نے کہا کہ اس خطے میں جموں و کشمیر کا تنازع ایک دیرینہ مسئلہ ہےجس کے پائیدار حل کی بنیاد غیرجانبدارانہ رائے شماری اور سلامتی کونسل کی متعلقہ قراردادوں پر عمل درآمد ہے۔
ان کا کہنا تھا کہ آج کے دن فلسطین کے معصوم لوگوں کی حالت زار کو بھی نظر انداز نہیں کرنا چاہیے، امن کیلئے پاکستان عالمی برادری کے ساتھ مل کر کام کرنے کیلئے تیار ہے۔