اقوام متحدہ خاص کر سلامتی کونسل اجلاس کے دوران سعودی عرب کے وزیر خارجہ شہزادہ فیصل بن فرحان نے جامع اصلاحات کی ضرورت پر زور دیا ہے تاکہ بڑھتے ہوئے بحرانوں کو ختم کیا جاسکے۔
سعودی خبر رساں ادارے کے مطابق نیویارک میں اقوام متحدہ کی جنرل اسمبلی اجلاس کے موقع پر شہزادہ فیصل بن فرحان نے جی 20 وزارئے خارجہ کے اجلاس میں شرکت کی۔
شہزادہ فیصل بن فرحان کا اجلاس سے خطاب کرتے ہوئے کہنا تھا کہ جنگیں اور سیاسی تنازعات کے اثرات بین الاقوامی امن و سلامتی کے قیام کی کوششوں کو سبوتاژ کرتے ہیں اور کثیر الجہتی اقدامات کے تمام پہلوؤں کو متاثر کرتے ہیں۔
جی 20 ممالک پر زوردیتے ہوئے سعودی عرب کے وزیر خارجہ شہزادہ فیصل بن فرحان کا کہنا تھا کہ ’وہ اسرائیل کی جانب سے کی جانے والی خلاف ورزیوں کا مقابلہ کرنے کے لیے اپنی کوششوں کو تیز کریں‘۔
شہزادہ فیصل بن فرحان کا مزید کہنا تھا کہ ’عالمی برادری اجتماعی طورپر ذمہ داریوں کا احساس کرتے ہوئے مسائل کے حل اور بحرانوں سے نمٹنے کے لیے عالمی امن کے قیام کے لیے اصلاحی طریقہ کار پرعمل کرے‘۔
واضح رہے نیویارک میں خلیج تعاون کونسل اور امریکہ کے درمیان مشترکہ وزارتی اجلاس میں سعودی وزیر خارجہ شہزادہ فیصل بن فرحان نے شرکت کی جس میں امریکہ اور خلیج تعاون کونسل کے مابین تعاون کے علاوہ علاقائی اور دیگر باہمی دلچسپی کے امور پر بھی تبادلہ خیال کیاگیا۔