پاکستان کرکٹ ٹیم نے جنوبی افریقا کی سرزمین پر نئی تاریخ رقم کر دی، پہلی بار میزبان ٹیم کو ون ڈے سیریز میں وائٹ واش کا مزہ چکھا دیا۔
سیریز کے آخری ون ڈے میں پاکستان نے جنوبی افریقا کو 36 رنز سے شکست دے کر یہ تاریخی سنگِ میل عبور کیا۔ تین میچز کی سیریز کا یہ فیصلہ کن مقابلہ جوہانسبرگ میں کھیلا گیا، جہاں بارش کی مداخلت کے باعث میچ کو 47 اوورز تک محدود کر دیا گیا تھا۔
پاکستان کی بیٹنگ کا طوفان
پہلے بیٹنگ کرتے ہوئے پاکستان نے 309 رنز کا پہاڑ جیسا ہدف سیٹ کیا۔ عبداللہ شفیق بغیر کوئی رن بنائے جلدی آؤٹ ہو گئے، لیکن صائم ایوب اور بابر اعظم نے شاندار پارٹنرشپ کے ذریعے اننگز کو سنبھالا۔
صائم ایوب نے 54 گیندوں پر 7 چوکوں اور 1 چھکے کی مدد سے نصف سنچری بنائی، جبکہ بابر اعظم نے 71 گیندوں پر 52 رنز اسکور کیے۔ صائم نے اپنی کلاس دکھاتے ہوئے 91 گیندوں پر 101 رنز کی شاندار سنچری مکمل کی، جس میں 13 دلکش چوکے اور 2 شاندار چھکے شامل تھے۔
محمد رضوان نے 53 اور سلمان علی آغا نے آخری لمحات میں دھواں دار 48 رنز بنا کر اسکور کو مزید مضبوط کیا۔
جنوبی افریقا کا بے نتیجہ تعاقب
ہدف کے تعاقب میں میزبان ٹیم کی اننگز مشکلات کا شکار رہی۔ ابتدائی وکٹ جلدی گرنے کے بعد ان کے بلے باز پاکستانی باؤلرز کے سامنے بے بس دکھائی دیے۔
ہینرخ کلاسن نے 81 رنز کی مزاحمتی اننگز کھیل کر ٹیم کو سنبھالنے کی کوشش کی، مگر شاہین آفریدی نے ان کی امیدوں پر پانی پھیر دیا۔ دیگر کھلاڑیوں میں کوربن نے 40، ریسی وین نے 35، اور ٹونی ڈی زورزی نے 26 رنز بنائے، مگر وہ پاکستان کے باؤلنگ حملے کے سامنے ڈٹے نہ رہ سکے۔
پاکستان کے باؤلرز کی تباہ کاری
صفیان مقیم نے چار کھلاڑیوں کو پویلین کی راہ دکھائی، جبکہ شاہین شاہ آفریدی اور نسیم شاہ نے دو دو شکار کیے۔ محمد حسنین اور صائم ایوب نے بھی ایک ایک وکٹ حاصل کی۔
پاکستان کی اس تاریخی کامیابی نے جنوبی افریقا کی سرزمین پر ایک نئی تاریخ رقم کر دی، جسے شائقین ہمیشہ یاد رکھیں گے