"لوگ آج بھی مجھے ٹرول کرتے ہیں اور کہتے ہیں کہ آپ نے اسکرٹ پہن لی تھی، اب آپ استغفار نہیں کر سکتیں۔ میں پوچھتی ہوں، کہاں لکھا ہے کہ ایسا ممکن نہیں؟ ہر شخص کو اپنی اصلاح کا حق ہے۔" وینا ملک نے متھیرا کے شو میں اپنے خیالات کا کھل کر اظہار کرتے ہوئے یہ سوال اٹھایا۔
ماضی کی متنازع اداکارہ و میزبان وینا ملک نے پروگرام میں گفتگو کرتے ہوئے بتایا کہ ان کی پرورش ایک مذہبی ماحول میں ہوئی اور وہ ہمیشہ سے دینی رجحانات رکھتی ہیں۔ ان کا کہنا تھا کہ یہی رجحان انہیں حجاب کی طرف لے گیا، اور آج بھی وہ دل سے اسی راہ پر گامزن ہیں۔
وینا نے کہا کہ اگر نئی نسل قرآن پاک کو سمجھ کر پڑھے تو کسی مولوی کے پاس جانے کی ضرورت نہیں رہے گی، کیونکہ مقدس کتاب میں زندگی کے تمام اصول واضح طور پر بیان کیے گئے ہیں۔
اداکارہ نے ماضی کے تنازعات پر بات کرتے ہوئے کہا کہ ایک وقت تھا جب انہوں نے ٹی وی پر مذہبی پروگرام کی میزبانی کی، لیکن انہیں اس پر بھی سخت تنقید کا سامنا کرنا پڑا۔ ان کا کہنا تھا کہ لوگوں نے ان کے ماضی کے لباس کو بنیاد بنا کر انہیں تنگ کیا، مگر وہ یہ واضح کرنا چاہتی ہیں کہ ہر انسان کو اپنی زندگی بدلنے اور اپنے رب سے رجوع کرنے کا حق حاصل ہے۔
پروگرام کے دوران وینا نے مفتی قوی پر الزام عائد کیا کہ انہوں نے ان کی کردار کشی کی اور ان کی زندگی کو خراب کرنے کی کوشش کی۔ انہوں نے افسوس کا اظہار کیا کہ ایک بزرگ ہونے کے باوجود مفتی قوی نے ان کے فیصلوں پر تنقید کی۔ تاہم، مولانا طارق جمیل سے متعلق ان کا کہنا تھا کہ وہ انتہائی نرم دل اور اعلیٰ اخلاق کے مالک ہیں۔
وینا نے بتایا کہ مولانا طارق جمیل سے ان کی کئی ملاقاتیں ہوئیں اور کبھی بھی انہوں نے ان پر ماضی کے کسی عمل کے بارے میں سوال نہیں اٹھایا۔ بلکہ ان کا انداز ہمیشہ حوصلہ افزا اور مثبت تھا۔
وینا ملک کی زندگی کے ان پہلوؤں نے ایک بار پھر ان کی شخصیت کو زیر بحث لا دیا ہے، جہاں وہ خود کو اپنے فیصلوں کا ذمہ دار قرار دیتے ہوئے کہتی ہیں کہ کسی کو حق نہیں کہ ان کی ذاتی زندگی میں مداخلت کرے۔