انڈیا میں بِپھرے ہوئے جنگلی ہاتھی کا حملہ، موٹرسائیکل سوار جرمن سیاح ہلاک

انڈیا میں پولیس کا کہنا ہے کہ تامل ناڈو کے فارسٹ ریزرو میں جرمنی سے تعلق رکھنے والے ایک سیاح  ہاتھی کے حملے میں ہلاک ہوگیا۔فرانسیسی خبر رساں ایجنسی اے ایف پی کے مطابق 77 برس کے جرمن شہری منگل کو کرائے پر حاصل کیے گئے موٹرسائیکل پر تامل ناڈو کی ریاست میں ٹائیگر ویلی سے گزر رہے تھے۔ 

اس دوران جنگل کو جانے والی سڑک پر ایک بِپھرے ہوئے ہاتھی نے غیر ملکی سیاح پر حملہ کردیا اور اسے درختوں میں پھینک دیا۔مقامی پولیس افسر کا کہنا ہے کہ ’جرمن سیاح نے وہاں سے گزرنے والے دیگر افراد کی ہدایات کو نظرانداز کیا جنہوں نے ہاتھی کو دیکھنے کے بعد اس سے فاصلہ برقرار رکھا اور بعدازاں آگے بڑھ گئے۔‘انہوں نے مزید بتایا کہ ’ہاتھی کے حملے کے بعد غیر ملکی سیاح کو مقامی ہسپتال لے جایا جا رہا تھا کہ اس دوران وہ راستے میں ہی دم توڑ گئے۔‘پولیس نے کہا ہے کہ ’مرنے والے سیاح کی فیملی سے رابطے کی کوشش کی گئی لیکن ہمیں کوئی جواب موصول نہیں ہوا۔‘مقامی میڈیا کا کہنا ہے کہ ’موقعے پر موجود دیگر افراد کی جانب سے تنبیہہ کے باوجود سیاح نے ہاتھی کی جانب اپنا سفر جاری رکھا اور ہاتھی کو دیکھ کر زور سے ہارن بھی بجایا تاکہ وہ سائیڈ سے گزر جائے۔‘فارسٹ افسر جی وینکاٹش نے بتایا کہ ’جرمن سیاح کی جانب سے وارننگ کو نظرانداز کرنے اور ہاتھی کی موجودگی میں سڑک پار کرنے کی کوشش کے نتیجے میں یہ المناک حادثہ پیش آیا۔واضح رہے کہ انڈیا میں ایک اندازے کے مطابق 30 ہزار ایشیائی جنگلی ہاتھی موجود ہیں، اور مقامی افراد کی جانب سے جنگل کی جانب جانے کی صورت میں وہ اکثر اوقات اُن پر حملہ کر دیتے ہیں۔