کراچی کی فضاء آج صبح سے ہی بادلوں کی چھاؤں میں ڈوبی ہوئی ہے، اور محکمہ موسمیات نے مزید بارشوں کی پیش گوئی کر دی ہے۔
جمعرات اور جمعہ کی درمیانی رات کراچی کے مکینوں کے لیے قدرے ٹھنڈی تھی، جبکہ صبح سے شہر کا آسمان ابر آلود ہو چکا ہے۔ بلوچستان کے راستے داخل ہونے والا مغربی سلسلہ شہر پر اپنے اثرات دکھانے لگا ہے۔
آج کراچی کا کم سے کم درجہ حرارت پچھلے دنوں کے مقابلے میں 1.5 ڈگری کم ہو کر 18 ڈگری سینٹی گریڈ تک پہنچ گیا۔ محکمہ موسمیات کا کہنا ہے کہ آج پورا دن کراچی میں جزوی یا مکمل طور پر ابر آلود رہنے کا امکان ہے۔ شام اور رات کے اوقات میں شہر کے مختلف علاقوں میں بونداباندی اور پھوار کی توقع بھی کی جا رہی ہے۔