گرمی کی دھوپ اور پیاس سے بھرپور دوپہر ہو، اور دسترخوان پر ایک تربوز کی ٹھنڈی اور سرخ پلیٹ ہو، تو بھلا کوئی کیوں نہ کھنچتا چلا آئے؟ مگر افسوس تربوز اپنے رنگ روپ سے جتنا لالچ دے، اندر سے اتنا ہی بے ذائقہ نکل سکتا ہے! ایسے میں سوال یہ ہے کہ آخر کیسے پہچانا جائے کہ تربوز میٹھا نکلے گا یا پھیکا؟

تربوز کے چھلکے پر موجود وہ سنہری دھبہ

اگر تربوز پر زردی لیے نشان موجود ہو تو گویا پھل نے پوری دھوپ سینک کر مٹھاس کی دولت سمیٹی ہے۔ لیکن اگر یہی نشان سفید یا ہلکا سبز ہو تو سمجھ لیں کہ یہ تربوز ابھی "پکنے کے سفر" پر ہی ہے، منزل پر نہیں پہنچا یعنی پھیکا ہے۔

وزن

اگر تربوز کو اٹھاتے ہی آپ کو ایسا لگے جیسے یہ اپنے سائز سے کہیں زیادہ بھاری ہے، تو مبارک ہو! یہ وزن نہیں، رس کا خزانہ ہے۔ پکا ہوا تربوز ہمیشہ اپنے قد و قامت سے زیادہ بھاری محسوس ہوتا ہے جیسے کوئی بھید چھپا رہا ہو۔

تربوز والے نے راز بتا دیا

یوٹیوب پر موجود ایک ویڈیو میں تربوز والے نے میٹھے پھل کا راز بتا دیا۔ تربوز کو ایک ہلکی سی تھپکی دیں۔ اگر جواب میں کوئی کھوکھلی، کرخت آواز آئے تو آگے بڑھ جائیں، یہ پھل بے ذائقہ ہو سکتا ہے۔ مگر اگر آواز ایسی ہو جیسے کسی نے ساز کی تار چھیڑ دی ہو، گونجیلی اور بھری ہوئی تو یقیناً تربوز سرخ اور میٹھا ہوگا۔

تو اگلی بار جب بازار میں کھڑے ہوں، اور تربوزوں کی فوج آپ کو گھور رہی ہو، تو ان تین سادہ ٹیسٹوں سے کام لیں۔ زردی مائل نشان، وزن اور آواز۔