بھارتی وزیر داخلہ امیت شاہ کی جانب سے سندھ طاس معاہدے کو بحال نہ کرنے کے اعلان پر پاکستان نے شدید ردعمل دیتے ہوئے اسے بین الاقوامی معاہدوں کی کھلی خلاف ورزی قرار دیا ہے۔بھارتی اخبار ٹائمز آف انڈیا کو دیے گئے ایک انٹرویو میں امیت شاہ نے کہا کہ "نئی دہلی سندھ طاس معاہدے کو کبھی بحال نہیں کرے گی، اور پاکستان جانے والے پانی کو ایک نہر کے ذریعے راجستھان منتقل کیا جائے گا۔" ان کا مزید کہنا تھا کہ "پاکستان بلاجواز جس پانی سے فائدہ اٹھا رہا تھا، اب وہ اسے نہیں ملے گا۔"
اس بیان پر ردعمل دیتے ہوئے پاکستان کے دفتر خارجہ نے ایک سخت بیان جاری کیا، جس میں کہا گیا کہ "یہ بیانات بین الاقوامی معاہدوں کی حرمت کی صریح خلاف ورزی ہیں۔ سندھ طاس معاہدہ ایک غیر سیاسی، باقاعدہ اور بین الاقوامی طور پر تسلیم شدہ معاہدہ ہے، جس میں یکطرفہ فیصلوں کی کوئی گنجائش نہیں۔"
دفتر خارجہ نے واضح کیا کہ بھارت کی جانب سے معاہدے کو معطل کرنے کا اعلان بین الاقوامی قانون، معاہدے کی شقوں، اور عالمی تعلقات کے بنیادی اصولوں کی خلاف ورزی ہے۔ بیان میں مزید کہا گیا کہ "پانی کو سیاسی ہتھیار کے طور پر استعمال کرنا نہ صرف غیر ذمہ دارانہ عمل ہے بلکہ یہ عالمی سطح پر ایک خطرناک مثال قائم کرتا ہے۔"
پاکستان نے بھارت سے مطالبہ کیا کہ وہ سندھ طاس معاہدے کی مکمل بحالی کو فوری طور پر یقینی بنائے، اور یہ باور کرایا کہ پاکستان معاہدے کی مکمل پاسداری کرتا ہے اور اپنے آبی حقوق کے تحفظ کے لیے ہر ممکن اقدام کرے گا۔
اس معاملے پر پیپلز پارٹی کے چیئرمین بلاول بھٹو زرداری نے بھی شدید ردعمل دیا۔ انہوں نے خبردار کیا کہ "اگر بھارت معاہدے کی پاسداری سے انکار کرتا ہے تو ہم ایک اور جنگ لڑنے کو تیار ہیں۔ ہمیں معلوم ہے کہ اپنے دریاؤں کا دفاع کیسے کرنا ہے۔"
وزیر اعظم شہباز شریف نے بھی حالیہ دنوں میں بھارت کے اقدامات کو "آبی جارحیت" قرار دیتے ہوئے کہا تھا کہ پاکستان اس کا مؤثر جواب دے گا اور یہ معاملہ قومی سلامتی کمیٹی کے فیصلوں کی روشنی میں نمٹایا جائے گا۔
ادھر مقبوضہ جموں و کشمیر کے سابق وزیر اعلیٰ عمر عبداللہ نے بھی مرکزی حکومت کی آبی پالیسی پر اعتراض کرتے ہوئے کہا کہ جب جموں و کشمیر خود پانی کی قلت کا شکار ہے تو ریاست کا پانی پنجاب یا دیگر علاقوں کو کیوں منتقل کیا جا رہا ہے؟ انہوں نے خبردار کیا کہ وہ ایسے کسی منصوبے کو قبول نہیں کریں گے۔
ماہرین کا کہنا ہے کہ بھارت کی جانب سے سندھ طاس معاہدے سے انحراف کا کوئی بھی قدم نہ صرف خطے میں پانی کے بحران کو سنگین بنا سکتا ہے بلکہ دو ایٹمی قوتوں کے درمیان کشیدگی میں خطرناک حد تک اضافہ کر سکتا ہے۔