پاکستان رینجرز (سندھ) اور پولیس نے انٹیلی جنس معلومات کی بنیاد پرمشترکہ کارروائی کرتے ہوئے مال بردار گاڑیوں کو لوٹنے اور ڈرئیواروں کو اغوا کرنے میں ملوث 6 ملزمان کو گرفتار کر لیا۔
تفصیلات کے مطابق گرفتار ملزمان فہیم اللہ مروت، جواد سواتی، زین اللہ مروت،شعیب، محمد عباس سواتی اور اللہ داد عرف قاری بشیر عرف قاری سید نور (افغانی) کراچی کے علاقے سپرہائی وے، سہراب گوٹھ، گڈاپ ٹاؤن اور ناردرن بائی پاس سے مال بردار گاڑیوں کو لوٹنے اور ڈرئیواروں کو اغوا کرنے میں ملوث تھے۔
ملزمان سے ایک عدد 308بور رائفل بمعہ3عدد میگزین، ایک عدد 12بور رائفل بمعہ2عدد میگزین، 3عدد پستول بمعہ ایمونیشن اور وارداتوں میں استعمال ہونے والا ایک عدد موٹر سائیکل برآمد کر لیاگیا۔
ترجمان کے مطابق ملزمان گزشتہ چند ماہ سے کراچی سے اندرون ملک سامان لے جانے والی مال بردار گاڑیوں کو علاقہ سپرہائی وے، سہراب گوٹھ، گڈاپ ٹاؤن اور ناردرن بائی پاس سے ڈرائیور سمیت اغوا ء کرکے نامعلوم مقام پر منتقل کر دیتے اور قیمتی سامان کواتارنے کے بعد خالی مال بردار گاڑیوں کو کراچی میں کسی نامعلوم مقامات پر چھوڑجاتے تھے۔
گرفتار ملزمان کو بمعہ اسلحہ و ایمونیشن اور موٹر سائیکل مزید قانونی کاروائی کے لیئے پولیس کے حوالے کر دیا گیا۔