مصر اور لیورپول کے اسٹار فارورڈ محمد صلاح نے ایک اور سنگِ میل عبور کرتے ہوئے تیسری مرتبہ سال کے بہترین فٹبالر کا ایوارڈ جیت لیا۔
پروفیشنل فٹبالرز ایسوسی ایشن کی جانب سے 33 سالہ محمد صلاح کو سال کا بہترین فٹبالر قرار دیا گیا۔ 2017 میں لیورپول میں شامل ہونے والے صلاح نے گزشتہ پریمیئر لیگ سیزن میں شاندار کارکردگی دکھائی اور 29 گول اسکور کرنے کے ساتھ ساتھ 18 گول اسسٹ بھی فراہم کیے۔ ان کی شاندار پرفارمنس نے لیورپول کو ٹائٹل جتوانے میں اہم کردار ادا کیا۔
محمد صلاح گزشتہ سیزن میں سب سے زیادہ گول اسکور کرنے پر گولڈن بوٹ ایوارڈ اور سب سے زیادہ اسسٹ پر پلے میکر ایوارڈ بھی اپنے نام کر چکے ہیں۔ وہ ایک ہی سیزن میں پلیئر آف دی ائیر سمیت یہ تینوں اعزازات جیتنے والے پہلے کھلاڑی بن گئے ہیں۔
اس سے قبل محمد صلاح 2018 اور 2022 میں بھی پروفیشنل فٹبالر آف دی ائیر کا ایوارڈ جیت چکے ہیں۔