اسلام آباد میں روات کے قریب افسوسناک حادثے میں ایک پولیس اہلکار شہید جبکہ دوسرا شدید زخمی ہو گیا۔
واقعہ اس وقت پیش آیا جب اسلام آباد پولیس کی موبائل وین اسنیپ چیکنگ کے لیے سڑک کنارے کھڑی تھی کہ اچانک تیز رفتار کار بے قابو ہو کر وین سے ٹکرا گئی۔
حادثے کے نتیجے میں پولیس وین کا ڈرائیور تحسین موقع پر ہی شہید ہوگیا جبکہ دوسرا اہلکار ساجد شدید زخمی ہوا جسے فوری طور پر قریبی اسپتال منتقل کیا گیا جہاں اسے طبی امداد فراہم کی جارہی ہے۔
تصادم اتنا شدید تھا کہ دونوں گاڑیاں مکمل طور پر تباہ ہوگئیں۔ حادثے کے بعد کار سوار ڈرائیور موقع سے فرار ہونے میں کامیاب ہوگیا۔
اسلام آباد پولیس نے جائے وقوعہ پر پہنچ کر شواہد اکٹھے کرلیے ہیں اور فرار ملزم کی تلاش کے لیے ٹیمیں تشکیل دے دی گئی ہیں۔ پولیس حکام کے مطابق واقعے کی مزید تحقیقات جاری ہیں اور جلد ہی ذمہ دار کو گرفتار کرلیا جائے گا۔