پشاور: خیبر پختونخوا حکومت کے واضح احکامات کے باوجود محکمہ لائیو اسٹاک آٹھ ماہ گزرنے کے باوجود ماڈل میٹ پروسیسنگ پلانٹ فعال نہ کر سکا۔
وزیراعلیٰ خیبر پختونخوا علی امین گنڈا پور نے پلانٹ کی عدم فعالیت پر برہمی کا اظہار کرتے ہوئے محکمہ لائیو اسٹاک کو 15 اکتوبر تک پلانٹ کو فعال بنانے کی ہدایت جاری کی۔ انہوں نے مزید ہدایت دی کہ ٹریننگ شروع کرنے کے لیے رجسٹریشن کا عمل فی الفور شروع کیا جائے اور ٹریننگ سینٹر میں قائم ماڈل میٹ شاپ کو بھی فوری طور پر فعال بنایا جائے۔
محکمہ لائیو اسٹاک کے ذرائع کے مطابق افسران کی غفلت اور انتظامی ناہلی کے باعث یہ اہم منصوبہ کئی ماہ سے التوا کا شکار ہے۔ ذرائع کا کہنا ہے کہ حکومت کی جانب سے فنڈز کی فراہمی کے باوجود محکمہ لائیو اسٹاک ماڈل میٹ پروسیسنگ پلانٹ اور ٹریننگ سینٹر کو فعال کرنے میں ناکام رہا۔