سوشانت سنگھ کی موت کی تحقیقات میں نیا موڑ، سابق مینیجر مرکزِ نگاہ بن گئیں

وائس آف امریکہ اردو  |  Aug 03, 2020

ویب ڈیسک — 

بالی وڈ اداکار سوشانت سنگھ راجپوت کی موت کی تحقیقات معمہ بن گئی ہے۔ پولیس نے تحقیقات کا دائرہ وسیع کرتے ہوئے اُن کے بینک اکاؤنٹس کی تفصیلات اور اُن کے موبائل فون کی سرچ ہسٹری حاصل کرنے کے بعد نئے انکشافات کیے ہیں۔

ممبئی پولیس کمشنر پارم بیر سنگھ نے پیر کو پریس کانفرنس کے دوران بتایا کہ سوشانت اپنی سابق مینیجر دیشا سالین کی اچانک خود کشی اور اس کی وجہ میں اپنا نام سامنے آنے کے باعث شدید تناؤ کا شکار تھے۔

سوشانت نے 14 جون کو ممبئی کے باندرا اپارٹمنٹ میں گلے میں پھندا ڈال کر خودکشی کی تھی۔ سوشانت کی موت سے محض پانچ روز قبل ہی اُن کی سابق مینیجر نے بھی اپنی زندگی کا خاتمہ کیا تھا۔

ممبئی پولیس کمشنر نے بتایا کہ سوشانت دیشا سالین کی خودکشی کے بعد گوگل پر صرف یہی سرچ کرتے رہے تھے کہ دیشا سے متعلق لکھے جانے والے آرٹیکلز میں کہیں اُن کا نام تو نہیں۔

اُن کے بقول سوشانت کی سرچ ہسٹری سے معلوم ہوا ہے کہ وہ دیشا کی موت کے بعد نفسیاتی بیماریوں اور غیر تکلیف دہ موت کے بارے میں معلومات حاصل کر رہے تھے۔

ممبئی پولیس کمشنر کا کہنا تھا کہ اپنی موت سے قبل سوشات دو گھنٹے تک گوگل پر اپنا نام تلاش کرتے رہے تھے جس کے بعد انہوں نے اپنی زندگی کا بھی خاتمہ کر لیا۔

SEE ALSO:سوشانت سنگھ نے خود کشی کیوں کی؟ بالی وڈ میں بحث جاری

پریس کانفرنس کے دوران ممبئی پولیس کمشنر نے کہا کہ سوشانت نے اپنے وکیل کو ایک پیغام بھی بھیجا تھا جس میں انہوں نے وکیل سے دریافت کیا تھا کہ دیشا کی خودکشی کے کیس میں اُن کا نام کیوں لیا جا رہا ہے۔

سوشانت کی موت کا ذمہ دار ان کی گرل فرینڈ ریا چکروتی کو قرار دیا جا رہا تھا جب کہ اداکار کے والد نے بھی ریا کو ایک مقدمے میں ملزمہ نامزد کیا ہے۔

ریا چکروتی ممبئی کے فلیٹ میں سوشانت کے ساتھ ہی رہائش پذیر تھیں۔ ممبئی پولیس کمشنر نے ریا چکروتی سے متعلق بتایا کہ ریا نے سوشانت کی موت سے چھ روز قبل اُنہیں چھوڑ دیا تھا کیوں کہ وہ خود بھی شدید نفسیاتی دباؤ کا شکار تھیں۔ ان کے بقول ریا کی ذہنی حالت بھی نارمل نہیں ہے۔

پولیس کمشنر کے مطابق ریا کے سوشانت کے اہلِ خانہ کے ساتھ کچھ تنازعات چلے آ رہے تھے جب کہ سوشانت کی خود کشی کی تحقیقات کے سلسلے میں ریا کا دو مرتبہ بیان قلم بند کیا گیا ہے۔

ممبئی پولیس کمشنر نے بتایا کہ انہوں نے سوشانت کے اہلِ خانہ سے رابطہ کرنے کی کوشش کی لیکن کوئی بھی بیان دینے کے لیے دستیاب نہیں ہے۔

ممبئی پولیس کمشنر نے مزید کہا کہ سوشانت کے جنوری 2019 سے جون 2020 تک کی تمام بینک اسٹیٹ منٹس کا تجزیہ کیا گیا ہے۔ ان کے اکاؤنٹ میں تقریباً ساڑھے 14 کروڑ روپے موجود ہیں۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More