کوئٹہ اور سبی کے درمیان شٹل ٹرین چلانے کا اعلان

بول نیوز  |  Aug 10, 2020

وفاقی وزیر ریلوے شیخ رشید احمد نے کوئٹہ اور سبی کے درمیان شٹل ٹرین چلانے کا اعلان کردیا۔

تفصیلات کے مطابق وفاقی وزیر ریلوے شیخ رشید احمد نے اپنے ایک بیان میں کہا کہ بلوچستان میں شدید سیلاب کی وجہ سے پھنسےمسافروں کی سہولت کے لیے 10 اگست کو صبح 10 بجے کوئٹہ سے سبی کے لیے شٹل ٹرین چلےگی،10اگست کو شام 4 بجے سبی سے کوئٹہ کے لیےشٹل ٹرین چلےگی۔

وفاقی وزیر ریلوے نے کہا کہ بلوچستان میں شدید سیلاب کی وجہ سے سڑکوں کا نظام متاثر ہوا ہے جس کے باعث کوئٹہ سے سبی کے درمیان آمدورفت میں مشکلات ہیں۔

شیخ رشید احمد نے یہ بھی کہا کہ سبی ریلوے اسٹیشن پرمسافروں کی بڑی تعداد موجود ہے، ڈی ایس کوئٹہ کو ہدایت کی ہے سبی میں پھنسے لوگوں کو فوری کوئٹہ واپس لایا جائے۔

وفاقی وزیر ریلوے شیخ رشید احمد نے مزید کہا کہ ایف سی کو ٹرین کی سیکیورٹی کی خصوصی ہدایات دی ہیں کہ کوئٹہ اور سبی کے درمیان شٹل ٹرین اس وقت تک چلیں گی جب تک سڑکوں کا نظام بہتر نہیں ہوجاتا یا جب تک سیلابی پانی نہیں اترتا۔

بلوچستان میں سیلاب کی تباہی

یاد رہے اس سے قبل طوفانی بارشوں نے بلوچستان میں تباہی مچادی ہے، مستونگ، خضدار، ہرنائی، نوشکی، لورا لائی، ڈھاڈر میں سیلابی ریلوں میں متعدد مویشی بہہ گئے ہیں۔

بارشوں سے کھڑی فصلوں کو نقصان پہنچا جبکہ قومی شاہراہوں پر جگہ جگہ آمدورفت معطل ہوگئی ہے جبکہ دو افراد برساتی پانی میں ڈوب کر جاں بحق ہوگئے ہیں جس کے بعد گہرے سمندر ، ندیوں اور ڈیموں کے قریب عوامی پکنک کے مقامات  کی بندش زیر غور آئے ہیں۔

دوسری جانب بلوچستان میں سیلابی صورتحال کے باعث محکمہ صحت نے صوبے کے تمام اسپتالوں میں ایمرجنسی نافذ کردی ہے۔

پارلیمانی سیکرٹری صحت ڈاکٹرربابہ خان بلیدی نے بتایا تھا کہ صوبائی دارلحکومت کوئٹہ سمیت صوبے کے تمام ڈویژن اور ضلعی اسپتالوں میں ڈاکٹرز اور طبی اسٹاف کو اپنی اپنی جائے تعیناتیوں پر حاضری یقینی بنانے کی ہدایت کی گئی ہے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More