ہمارا مقصد عوام کے مسائل حل کرنا ہے

بول نیوز  |  Dec 03, 2020

پاکستان پیپلز پارٹی کے مرکزی رہنما یوسف رضا گیلانی کا کہنا ہے کہ ہمارا مشن عوام کے مسائل کو حل کرنا ہے۔

تفصیلات کے مطابق سابق وزیراعظم یوسف رضا گیلانی نے مسلم لیگ ن کے صدر اور اپوزیشن لیڈرقومی اسمبلی شہباز شریف سے ملاقات کے بعد میڈیا سے بات کرتے ہوئے کہا کہ عوام کے مسائل کو حل کرنا ہمارا مشن ہے جبکہ پاکستان ڈیمو کریٹک موومنٹ (پی ڈی ایم) کا لاہور کا جلسہ بھی کامیاب ہو گا۔

انہوں نے کہا کہ میں جب وزیر اعظم تھا تو سب سے پہلے نظر بند ججز کو رہا کرنے کا حکم دیا اور میں نے حزب اختلاف کو اسمبلی میں کہا تھا کہ ہمیں آپ کی ضرورت ہے۔

یوسف رضا گیلانی نے مزید کہا کہ ہمارے دور میں کوئی سیاسی قیدی نہیں تھا اور میں واحد وزیر اعظم تھا جو متفقہ طور پر منتخب ہوا، عمران خان تو کہتا تھا کہ جلسے کرو میں کنٹینر دوں گا۔

واضح رہے کہ پی ڈی ایم کا 13 دسمبر کو مینار پاکستان پر جلسہ ہو گا اور جلسے کو کامیاب بنانے کے لیے مسلم لیگ ن نے لاہور شہر میں جلسوں کا فیصلہ کر لیا ہے اور مسلم لیگ ن کی جانب سے لاہور کے تمام قومی اسمبلی کے حلقوں میں جلسے ہوں گے۔

دوسری جانب مسلم لیگ ن کے مرکزی رہنما خواجہ سعد رفیق کا کہنا ہے کہ  13 دسمبر کے جلسے میں عوام بھرپور شرکت کریں گے۔

 لاہور میں مسلم لیگ ن  کے رہنما خواجہ سعد رفیق نے اپوزیشن لیڈر قومی اسمبلی شہباز شریف کی رہائش گاہ پر میڈیا سے گفتگو کرتے ہوئے کہا کہ پاکستان ڈیموکریٹک موومنٹ (پی ڈی ایم) لاہور کے جلسے کے لیے بھرپور تیاریاں کر رہی ہے، 13 دسمبر کا یہ جلسہ فقیدالمثال ہو گا۔

واضح رہےکہ خواجہ سعد رفیق شہباز شریف سے ان کی رہائش گاہ پرملاقات کے لیے آئے تھے۔

والدہ کے انتقال کے باعث پیرول پر رہا کیے گئے  قومی اسمبلی میں قائدِ حزبِ اختلاف  شہباز شریف اور ان کے صاحبزادے وپنجاب اسمبلی میں اپوزیشن لیڈر حمزہ شہباز آج پیرول ختم ہونے پر کوٹ لکھپت جیل واپس جائیں گے۔

دونوں لیگی رہنما 27 نومبر کو 4 بجے 5 روزہ پیرول پر رہا ہوئے تھے، پنجاب حکومت نے کل ان کی پیرول پر رہائی میں 24 گھنٹےکی توسیع کر دی تھی۔

متعلقہ خبرشہباز شریف اور حمزہ شہباز کی پیرول پر رہائی کا آج آخری دن

مسلم لیگی رہنما شہباز شریف اور حمزہ شہباز کی پیرول پر رہائی...

اس کے علاوہ مسلم لیگ ن کے سینئیر رہنما رانا ثناء اللہ کا کہنا ہے کہ 13 دسمبر کا جلسہ ہوگا اور یہ جلسہ حکومت کے خلاف ریفرنڈم ہوگا۔

  میڈیا سے گفتگو کرتے ہوئے انھوں نے کہا کہ  سیاسی رواداری ہمارے معاشرے کا خاصہ تھی، مگر عمران نیازی نے سیاسی رواداری کا جنازہ نکال دیا ہے۔

-->
مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More