پاکستان نے زمبابوے کو ٹیسٹ سیریز میں کلین سوئپ کردیا

بول نیوز  |  May 10, 2021

پاکستان نے دوسرے ٹیسٹ میں زمبابوے کو اننگز اور 147 رنز سے شکست دے کر دو میچز کی  سیریز میں وائٹ واش کردیا۔

ہرارے اسپورٹس کمپلیکس میں کھیلے گئے دوسرے ٹیسٹ میں پاکستان نے ٹاس جیت کر پہلے بیٹنگ کرنے کا فیصلہ کیا تو پہلی وکٹ 12 کے مجموعی اسکور پر گر گئی۔

عمران بٹ2 رنز بناکر پویلین لوٹ گئے تاہم عابد علی اور اظہر علی نے دوسری وکٹ کے لیے 236 رنز کی شراکت قائم کی۔اظہر علی 126 رنز بناکر آؤٹ ہوئے۔

عابدعلی 215 رنز بناکر ناقابل شکست رہے جبکہ نعمان علی 97 رنز بناکر آؤٹ ہوئے۔ان کے علاوہ محمد رضوان 21 ، ساجد خان 20 ، کپتان بابر اعظم 2 اور فواد عالم 5 رنز بناسکے جبکہ حسن علی صفر پر آؤٹ ہوئے۔

دوسرے روز چائے کے وقفے کے بعد پاکستان نے اپنی پہلی اننگز 510 رنز آٹھ کھلاڑی آؤٹ پر ڈکلیئر کردی۔

WINNERS 💚#ZIMvPAK #HarHaalMainCricket #BackTheBoysInGreen pic.twitter.com/Vav3xAa5z7

— Pakistan Cricket (@TheRealPCB) May 10, 2021

زمبابوے کی جانب سے بلیسنگ مزارابانی نے 3 ، ٹینڈائی چیسورونے 2 جبکہ رچرڈ نگاراوا، لیوک جونگوے اور ڈونلڈ تریپانو نے ایک ایک وکٹ حاصل کی۔

زمبابوے کی ٹیم اپنی پہلی اننگز میں 132 رنز پر ڈھیر ہوگئی۔ریگس چکابوا 33 اور ڈونلڈ تریپانو 23 رنز بناکر نمایاں رہے۔

پاکستان کی جانب سے حسن علی نے 5، ساجد خان نے 2 جبکہ تابش خان اور شاہین شاہ آفریدی نے ایک ایک وکٹ حاصل کی۔

دوسری اننگز میں ریگس چکابوا (80) اور کپتان برینڈن ٹیلر (49) کی جانب سے کچھ مزاحمت دیکھنے میں آئی تاہم  وہ اپنی ٹیم کو اننگز کی شکست سے نہ بچاسکے۔ ان کے علاہ لیوک جونگوے 37 رنز بناکر نمایاں رہے۔

پاکستان کی جانب سے شاہین شاہ آفریدی اور نعمان علی نے 5،5 وکٹیں حاصل کیں۔

عابد علی کو ناقابل شکست ڈبل سنچری  اسکور کرنے پر میچ کا بہترین کھلاڑی قرار دیا گیا جبکہ حسن علی کو 14 وکٹیں حاصل کرنے پر سیریز کا بہترین کھلاڑی قرار دیا گیا۔

--> Double Click 970 x 90
مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More