جیف بیزوس کیساتھ خلائی سفر، خالی سیٹ 4 ارب روپے سے زائد میں فروخت

ہم نیوز  |  Jun 13, 2021

معروف ای کامرس ویب سائٹ ایمازون کے مالک جیف بیزوس کے ساتھ خلائی سفر کرنے کے لیے نامعلوم شخص نے 4 ارب 36 کروڑ سے زائد  روپے میں سیٹ پکی کرا لی۔

غیر ملکی خبر رساں ادارے کی رپورٹ کے مطابق امریکی شہر بوسٹن میں ہونے والی لائیو نیلامی میں نامعلوم شخص نے بھاری رقم ادا کرکے سیٹ اپنے نام کرائی ہے۔

رپورٹ کے مطابق نیلامی سات منٹ تک جاری رہی جس میں ایک سو چالیس سے زائد ممالک کے سات ہزار لوگوں نے حصہ لیا۔ سیٹ خریدنے والے شخص نے اپنا نام پوشیدہ رکھا ہے۔

واضح رہے کہ بلیو اوریجن کمپنی پہلی دفعہ انسانوں کو خلا میں لے کر جائے گی۔ گیارہ منٹ کے خلائی سفر کا آغاز ٹیکساس کی وان ہورن بیس سے کیا جائے گا۔

خیال رہے کہ ایمازون کے بانی جیف بیزوس 20 جولائی کو اپنے بھائی کے ساتھ خلا کے سفر پر روانہ ہوں گے۔

57 سالہ جیف بیزوس کا کہنا ہے کہ پانچ سال کی عمر سے مجھے خلائی سفر کا شوق تھا۔

انہوں نے کہا کہ بہت جلد میرے شوق کی تکمیل ہو رہی ہے، میں اپنے بھائی کے ہمراہ 20 جولائی کو اس دلچسپ مہم پر روانہ ہوں گا۔

رپورٹ کے مطابق اگر سب کچھ پلان کے مطابق رہا تو جیف بیزوس خلائی سفر کرنے والے  دنیا کے پہلے ارب پتی شخص بن جائیں گے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More