شدید بارش کے پیشِ نظر کل تمام پرائیوٹ اسکول بند، امتحان ملتوی

کراچی میں رات بھر بارش جاری رہنے کے امکان کے پیشِ نظر کل شہر بھر کے تمام تر نجی اسکول بند رہیں گے۔ اس وقت بھی شہر کے مختلف علاقوں میں تیز اور ہلکی بارش جاری ہے۔

واضح رہے محکمہ موسمیات نے شہر بھر میں 100 ملی میٹر بارش ہونے کا امکان ظاہر کیا ہے۔ سندھ میں شدید بارشوں کی وجہ سے حیدر آباد میں بھی کل عام تعطیل کا اعلان کردیا گیا ہے اور کراچی انٹربورڈ نے کل ہونے والے تمام امتحانات ملتوی کردیے ہیں۔

ملتوی کیے جانے والے پرچے 25 اگست کو امتحانی مراکز پر شیڈول اور وقت پر لیے جائیں گے۔عملی امتحانات ری شیڈول کرنے کیلئے کالجوں کو ہدایات جاری کردی گئی ہیں۔ آرٹس ریگولر اور پرائیویٹ ، ساتھ ہی خصوصی امیدواروں کے پرچے اور عملی امتحانات ملتوی کر دیے۔ مہران یونیورسٹی اور شہید ذوالفقارعلی بھٹو کیمپس خیرپور بھی کل بند رکھنے کا اعلان کردیا گیا ہے۔