’ہم دیکھیں گے‘: فیض کی نظم پر انڈین فلم ڈائریکٹر کا دعویٰ، عمران خان پر غیر قانونی استعمال کا الزام

پاکستان میں عمران خان کی گرفتاری کے بعد پیدا ہونے والے صورتحال کے پیشِ نظر ملک گیر مظاہرے جاری ہیں، ممکن ہے کہ ملک میں فیض کی نظم ’ہم دیکھیں گے‘ ہر جگہ سنائی دے۔ لیکن اس مشہور انقلابی نظم کے بارے میں انڈین سوشل میڈیا پر بھی خوب بات ہو رہی ہے اور ایک مختلف وجہ سے۔

’کشمیر فائلز‘ نامی فلم کے ڈائریکٹر وویک اگنی ہوتری نے الزام لگایا ہے کہ عمران خان کے آفیشل انسٹاگرام اکاؤنٹ نے ’ہم دیکھیں گے‘ نظم کو، جو کہ ان کی 2022 کی فلم میں استعمال ہوا ہے، اپنے پروموشنل ویڈیوز میں غیر قانونی طور پر استعمال کیا ہے۔

اس متنازع فلم کشمیر میں عسکریت پسندی اور 1990 کی دہائی میں کشمیری پنڈتوں کی نقل مکانی کو موضوع بنایا گیا ہے۔ اس کی ریلیز کے وقت کشمیر کے تنازعات کی ’مسخ شدہ‘ شکل دکھانے کے باعث اس فلم پر شدید تنقید بھی ہوئی تھی۔

اس فلم میں یہ دکھایا گیا ہے کہ کشمیر میں ایک عسکریت پسندی کے بظاہر ہمدرد کالج کیمپس میں یہ نظم نوجوان مردوں اور عورتوں کا ایک گروپ سامعین کے لیے لائیو گا رہا ہے اور پس منظر میں لوگ کشمیر کی آزادی کے مطالبے والے بینر لہرا رہے ہیں اور آزادی کے نعرے لگا رہے ہیں۔

اگرچہ انڈیا اور پاکستان میں بہت سے گلوکاروں نے اس نظم کو اپنے طریقے سے گایا ہے لیکن گذشتہ برسوں میں انڈیا میں مظاہروں میں اس کے استعمال کو دائیں بازو نے تنقید کا نشانہ بنایا تھا، اور یہ دعویٰ کیا گیا تھا کہ یہ نظم اسلامی بالادستی کا مطالبہ کرتی ہے۔

اگنی ہوتری نے ٹویٹر پر یہ دعویٰ کیا کہ عمران خان کے آفیشل انسٹاگرام اکاؤنٹ نے اس گانے کو غیر قانونی طور پر استعمال کیا ہے۔ انھوں نے لکھا، ’پاکستان کی ستم ظریفی دیکھو: انڈِک سنیما کی طاقت دیکھیں۔ عمران خان کے آفیشل انسٹاگرام اکاؤنٹ پر کشمیر فائلز کے آفیشل گانے کو اپنے آفیشل ویڈیو میں غیر قانونی طور پر استعمال کر رہا ہے۔‘

https://twitter.com/vivekagnihotri/status/1656552197436456961

لیکن کئی صارفین نے نشاندہی کی کہ یہ ایک پاکستانی مارکسی شاعر فیض احمد فیض کی لکھی ہوئی نظم ہے اور متعدد گلوکاروں نے اسے اپنے طریقے سے گایا ہے اور اسے کسی ایک شخص سے منسوب نہیں کر سکتے ہیں۔

ایک ٹویٹر صارف ادوید نے نظم کی تاریخ بتاتے ہوئے کہا کہ ’ہم دیکھیں گے ایک انقلابی نظم ہے جو اردو کے شاعر فیض احمد فیض نے 1979 میں ضیاء الحق کی فوجی بغاوت کے بعد لکھی تھی۔ اسے پہلی بار اقبال بانو نے گایا تھا اور یہ نظم 1980 کی دہائی سے پاکستان کی سوشلسٹ تحریک کا حصہ رہی ہے‘۔

https://twitter.com/Advaidism/status/1656893075191640069

ایک اور صارف نے کہا کہ اگنی ہوتری کو اس اکاؤنٹ پر مقدمہ کرنا چاہیے۔ ’وہ اس گانے کے استعمال کے خلاف ڈی ایم سی اے (امریکہ کا کاپی رائٹ قانون) کے تحت ٹوئٹر سے شکایت درج کرا سکتے ہیں۔ ٹوئٹر عمران کا اکاؤنٹ لاک کر دے گا‘۔

https://twitter.com/AstroAmigo/status/1656841045999755265

صارفین کے اصرار پر کہ اس نظم کے کئی ورزن ہیں، اگنی ہوتری نے مزید کہا کہ انھوں نے اس گانے کے کاپی رائٹ اس کے مالکان سے خریدا ہے۔ ’نادانوں، یہ فیض احمد فیض نے لکھا ہے۔ ہم نے فیض ہاؤس سے اس کے حقوق خریدے۔ اس کے بہت سے ورژن ہیں۔ یہ ہمارا قانونی کاپی رائٹ ورژن ہے‘۔

https://twitter.com/vivekagnihotri/status/1656554789822509057

لیکن جاس اوبرائے نامی صارف نے واضح کیا کہ عام طور پر گانوں کا استعمال انسٹاگرام ریلز میں ہوتا ہے اور اسکا ایک طریقہ کار ہے۔

انھوں نے لکھا، ’ایک تو گانا آپ کا نہیں ہے۔ آپ نے اسے استعمال کرنے کے حقوق خریدے، اسے دوبارہ مکس کیا، لہٰذا صرف یہ مخصوص ورژن آپ کا ہے۔ دوسری بات یہ کہ انسٹاگرام ریلز اور سٹوریز کے ویڈیوز میں گانے کے استعمال کی اجازت دیتا ہے۔ بالکل یہی عمران خان نے کیا‘۔

انھوں نے مزید کہا کہ ’یہ کیسے غیر قانونی ہوا؟‘

https://twitter.com/iJasOberoi/status/1656844562701365248

اگر انسٹاگرام ریلز میں موسیقی کے استعمال کی بات کریں تو یہ صارفین کو اس کی آفیشل آڈیو لائبریری سے گانے منتخب کرنے کی اجازت دیتا ہیں۔ اس کے استعمال کی شرائط کے مطابق ’لائسنس یافتہ آڈیو کاپی رائٹ شدہ آڈیو ہے جو کہ لائبریری پر دستیاب ہے اور اس میں موسیقی، فلمیں، ٹی وی شو اور ساؤند ایفیکٹ جیسی چیزیں شامل ہیں۔‘

انسٹاگرام کی مزید یہ شرط ہے کہ ہر لائسنس یافتہ آڈیو استعمال کرتے وقت اس کے آرٹسٹ کو منسوب کیا جانا چاہیے اور اس میں ٹریک کا نام شامل ہونا چاہیے۔

عمران خان کے انسٹاگرام اکاؤنٹ نے بھی اپنے ریل کو کشمیر فائیلس میں استعمال ہوئے ’ہم دیکھیں گے‘ ورزن کو اس گلوکاروں سے منسوب کیا گیا ہے۔

اگرچہ گانوں میں معمولی تبدیلی کر کے اس کے متعدد ورژن اکثر بنائے جاتے ہیں جس کی صحیح شناخت کسی عام شخص کے لیے مشکل ہو سکتی ہے، لیکن ایپل کمپنی کی ملکیت والی ایپ شازم، جو گانے کے مختصر نمونے کی بنیاد پر اس کی شناخت میں مدد کرتی ہے، سے تصدیق ہوتا ہے کہ عمران خان کے اکاونٹ پر واقعی کشمیر فائل والا ورژن اسعمال ہوا ہے۔

https://twitter.com/fahdhumayun/status/1505165303562522626

واضح کر دیں کہ انسٹاگرام اور کاپی رائٹ ہولڈر اور کمپنی کے درمیان باہمی معاہدے کے بنا پر ایپ پر گانے کے استعمال سے ہونے سے والی آمدنی کو عام طور پر دونوں کے درمیان اشتراک کیا جاتا ہے۔

اگرچہ انسٹاگرام آڈیو لائبریری میں ’ہم دیکھیں گے‘ کے متعدد ورژن ہیں لیکن ایپ پر سرچ کرنے سے کشمیر فائلس کا ورژن سرفہرست نظر آتا ہے۔ انسٹاگرام کے مطابق، تین ہزار سے زیادہ صارفین نے اپنی انسٹاگرام ریلز میں اس گانے کے 25 سیکنڈ طویل ورژن کا استعمال کیا ہے۔

واضح کر دیں کہ مارچ 2022 میں بھی، جب یہ فلم ریلیز ہوئی تھی، سوشل میڈیا پر صارفین نے اس فلم میں ’ہم دیکھیں گے‘ نظم کو ’نظرثانی کے پروپیگنڈے‘ کے لیے استعمال کرنے پر تنقید کا نشانہ بنایا تھا۔