پاکستان کے دارالحکومت اسلام آباد سمیت ملک کے مختلف حصوں میں زلزلے کے جھٹکے محسوس کیے گئے ہیں۔
زلزلہ پیما سینٹر کے مطابق زلزلے کی شدت 5.7 ریکارڈ کی گئی ہے جبکہ اس کی گہرائی 94.1 کلومیٹر تھی۔
زلزلہ آج صبح 11 بج کر 47 منٹ پر آیا جس کا مرکز افغانستان اور تاجکستان کا سرحدی علاقہ بتایا گیا ہے۔
صوبہ پنجاب اور خیبرپختونخوا کے مختلف شہروں میں زلزلے کے جھٹکے محسوس کیے گئے ہیں تاہم کسی بھی علاقے سے جانی و مالی نقصان کی رپورٹ موصول نہیں ہوئی۔
خیال رہے کہ پچھلے ہفتے سنیچر کو اسلام آباد اور دیگر علاقوں میں زلزلے کے جھٹکے محسوس کیے گئے تھے جس کی شدت 5.5 ریکارڈ کی گئی تھی جبکہ اس کی گہرائی 12 کلومیٹر تھی۔
زلزلہ گزشتہ ہفتے سنیچر کی دوپہر 12 بج کر 31 منٹ پر آیا تھا جس کا مرکز راولپنڈی سے 60 کلومیٹر شمال مغرب میں واقع تھا۔