انڈیا، پاکستان لڑائی سے متاثرہ آئی پی ایل کا دوبارہ آغاز کب ہو گا؟

جوہری ہتھیاروں سے لیس ہمسایہ ممالک انڈیا اور پاکستان نے ہفتے کے روز جھڑپیں ختم کرتے ہوئے جنگ بندی کا اعلان کیا تھا جس کے بعد اس سے متاثر انڈین  پریم لیگ کو دوبارہ شروع کرنے کی باتیں ہو رہی ہیں۔

انڈین کرکٹ بورڈ (بی سی سی آئی) کے سیکٹری دیویجیت ساکھیا نے ویب سائٹ ’کرک بز‘ کو بتایا ہے کہ وہ ’صورتحال پر گہری نظر رکھے ہوئے ہیں۔‘

خبر رساں ادارے اے ایف پی کے مطابق دیوجیت ساکھیا نے مزید کہا ہے کہ ’انڈین پریمیئر لیگ (آئی پی ایل) کی بحالی کا فیصلہ تمام متعلقہ فریقین اور حکومتی حکام سے مشاورت کے بعد کیا جائے گا۔‘

بی سی سی آئی کے نائب صدر راجیو شکلا نے انڈین میڈیا کو بتایا ہے کہ ’اتوار کے روز حکام ملاقات کریں گے تاکہ آئندہ کا لائحہ عمل طے کیا جا سکے۔‘

یاد رہے کہ انڈیا اور پاکستان کے درمیان لڑائی کی وجہ سے جمعے کو آئی پی ایل ایک ہفتے کے لیے معطل کر دیا گیا تھا۔ اس سے قبل پنجاب کنگز اور دہلی کیپیٹلز کے درمیان دھرم شالہ سٹیڈیم میں ہونے والا میچ منسوخ کر دیا گیا تھا اور یہ مقام جموں سے تقریبا 200 کلومیٹر سے بھی کم فاصلے پر ہے جہاں اسی روز چند گھنٹے قبل دھماکے ہوئے تھے۔

فضائی حدود بند ہونے کی وجہ سے جمعے کو کھلاڑیوں کو دہلی واپس لانے کے لیے خصوصی ٹرین کا انتظام کیا گیا تھا جبکہ غیر ملکی کھلاڑی سنیچر کو اپنے ممالک کی طرف روانہ ہونا شروع ہو گئے تھے۔

اتوار کو ٹیموں کی جانب سے اپنے غیر ملکی کھلاڑیوں اور کوچنگ سٹاف سے واپسی کے حوالے سے رابطے کی اطلاعات موصول ہوئی ہیں تاہم  ای ایس پی این کرک انفو کے مطابق اگر حکومت سے منظوری مل جاتی ہے تو آئی پی ایل 15 مئی کے آس پاس دوبارہ شروع ہو سکتا ہے۔

آئی پی ایل کے باقی 12 میچز کے ساتھ تین پلے آف میچز اور فائنل باقی ہے جو ایونٹ کے متاثر ہونے سے قبل 25 مئی کو شیڈول تھا۔