اسلام آباد۔23مئی (اے پی پی):وفاقی وزیر ہاؤسنگ اینڈ ورکس میاں ریاض حسین پیرزادہ کی زیرصدارت پاکستان ہاؤسنگ اتھارٹی فاؤنڈیشن (پی ایچ اے۔ایف ) کے بورڈ آف ڈائریکٹرز کا 56واں اجلاس ہوا۔ اجلاس میں سیکرٹری ہاؤسنگ اینڈ ورکس ڈاکٹر شہزاد خان بنگش اور وزارت ہاؤسنگ، وزارت خزانہ، سی ڈی اے، ڈی جی ایف جی ای ایچ اے اور ایم ڈی پی ایچ اے ایف کے دیگر سینئر افسران نے بھی شرکت کی۔بورڈ کے سامنے پی ایچ اے ایف کے مختلف ترقیاتی منصوبوں سے متعلق ایجنڈا آئٹمز پیش کئے گئے۔جن کے بارے میں تفصیلی تبادلہ خیال کیا گیا اور مختلف جاری منصوبوں پر ترقیاتی کاموں کی رفتار تیز کرنے کے لئے مختلف تجاویز،حکمت عملیوں پر غور کیا گیا اور اس کے مطابق فیصلے کئے گئے۔اجلاس کے دوران وزارت ہاؤسنگ اینڈ ورکس اور اس سے منسلک محکموں ایف جی ای ایچ اے اور پی ایچ اے ایف کے ملازمین کو پلاٹوں، فلیٹس کے الاٹمنٹ کوٹہ کی ریزرویشن پر بھی بات ہوئی۔ میاں ریاض حسین پیرزادہ نے اس طرح کے کوٹہ کی ریزرویشن پر عدم اطمینان کا اظہار کیا اور کہا کہ پی ایچ اے ۔ایف اور ایف جی ای ایچ اے وفاقی حکومت کے ملازمین کی طرف سے پلاٹوں/فلیٹوں کی الاٹمنٹ کے لئے جمع کی گئی رقم کے محافظ ہیں۔ان کا موقف تھا کہ یہ دونوں ادارے دراصل وفاقی سرکاری ملازمین کی محنت کی کمائی کے امانتدار ہیں۔ وزارت اور اس سے منسلک محکموں، پی ایچ اے ایف، ایف جی ای ایچ اے اور ان اداروں میں مستعار خدمات پر آ ئے ملازمین کو الاٹمنٹ کے لئے کوٹہ مختص کرنا ان کی خدمات کی شرائط میں شامل نہیں ہے۔ لہٰذا مستقبل میں ان کی الاٹمنٹ اوپن میرٹ کی بنیاد پر کی جائے۔ وزیر نے مزید ہدایت کی کہ اس ایجنڈے کے آئٹم کوپی ایچ اے۔ایف اور ایف جی ای ایچ اےکے بورڈ آف ڈائریکٹرز کے آئندہ اجلاسوں میں فیصلے کے لئے شامل کیا جائے۔