برطانوی ولی عہد کی اہلیہ شہزادی کیٹ مڈلٹن نے کہا ہے کہ وہ کینسر کے علاج کے لیے کیموتھراپی کے بعد بہتر ہو رہی ہیں تاہم اب بھی وہ مکمل طور پر صحتیاب نہیں ہوئیں۔خبر رساں ادارے روئٹرز کے بعد شہزادی کیٹ مڈلٹن کینسر کی تشخیص کے بعد پہلی مرتبہ سنیچر کو سینٹرل لندن میں ٹروپنگ دی کلر ملٹری پریڈ میں شرکت کر رہی ہیں۔جمعہ کو جاری کیے گئے ایک پیغام میں شہزادی کیتھرین مڈلٹن نے مارچ میں کینسر کی تشخیص کے اعلان کے بعد دنیا بھر سے آنے والے ہزاروں نیک خواہشات پر مسرت کا اظہار کیا۔ان کا کہنا تھا کہ ’میں بہتر ہو رہی ہوں لیکن کیموتھراپی سے گزرنے والے کسی بھی شخص کو معلوم ہو گا کہ اس دوران اچھے اور برے دن ہوتے ہیں۔‘انہوں نے کہا کہ ’برے دنوں میں آپ کو کمزوری، تھکاوٹ محسوس ہوتی ہے اور آپ کو اپنے جسم کو آرام دینا پڑتا ہے لیکن اچھے دنوں پر جب آپ مضبوط محسوس کرتے ہیں، تو آپ بہتر محسوس کرنے کا زیادہ سے زیادہ فائدہ اٹھانا چاہتے ہیں۔‘ان کا کہنا تھا کہ ’میں سیکھ رہی ہوں کہ کس طرح صبر کرنا ہے، خاص طور پر غیریقینی کے وقت۔‘ شہزادی کیٹ کی صحت میں بہتری کا مطلب ہے کہ وہ گزشتہ دسمبر کے بعد پہلی مرتبہ عوام کے سامنے منظر عام پر آئیں گی۔سنیچر کی صبح 42 سالہ کیٹ اپنے تین بچوں، شہزادہ جارج، شہزادہ لوئی اور شہزادی شارلٹ کے ساتھ شاہ چارلس کی سرکاری سالگرہ کے موقع پر وسطی لندن میں منعقد ہونے والی سالانہ فوجی پریڈ ٹروپنگ دی کلر میں شرکت کریں گی۔ پریڈ میں شرکت سے قبل کیٹ مڈلٹن کی ایک نئی تصویر بھی ریلیز کی گئی۔ (فوٹو: اے ایف پی)وہ بکنگھم پیلس کی بالکونی میں کنگ چارلس، کوئین کنسورٹ کیملا اور شاہی خاندان کے دیگر سینیئر افراد کے ساتھ نظر آئیں گی۔شہزادی کیٹ نے کہا ہے کہ وہ رواں برس دیگر پروگراموں میں حصہ لینے کی امید کر رہی ہیں تاہم ان کے معاونین نے خبردار کیا ہے سنیچر کو ٹروپنگ دی کلر میں شرکت سے ان کی عوامی سطح پر مکمل واپسی نہیں ہو گی۔ اپنے پیغام شہزادی کیٹ کا کہنا تھا کہ ‘میرا علاج جاری ہے اور یہ کچھ مہینوں تک جاری رہے گا۔ میں اپنے خاندان کے ہمرا شاہ چارلس کی سالگرہ پریڈ میں شرکت کی منتظر ہوں۔‘پیٹ کی سرجریکیٹ مڈلٹن نے جنوری میں پیٹ کی بڑی سرجری کے بعد ہسپتال میں دو ہفتے گزارے تھے اور دو ماہ بعد ایک ویڈیو پیغام میں اعلان کیا کہ ٹیسٹ کرنے کے بعد ان میں کینسر کی موجودگی کا انکشاف ہوا جس کے علاج کے لیے کیموتھراپی کریں گی۔ان کے دفتر کینسنگٹن پیلس نے کینسر کی قسم یا اس کے علاج کے بارے میں مزید تفصیلات بتانے سے انکار کیا اور یہ صرف یہ کہا کہ کینسر سے نمٹنے کی کیموتھراپی فروری میں شروع ہوئی تھی۔شاہ چارلس اور ولی عہد شہزادہ ولیم نے کیٹ مڈلٹن کی واپسی پر خوشی کا اظہار کیا ہے۔