انڈیا اور بنگلہ دیش کے درمیان کرکٹ سیریز سے قبل ریاست گوا سے تعلق رکھنے والی دائیں بازو کی ہندو تنظیم نے سیریز کی منسوخی کا مطالبہ کیا ہے۔
انڈیا ٹوڈے کے مطابق ہندو جاناجگروتی سامیتھی نامی دائیں بازو کی تنظیم نے بنگلہ دیش میں ہندوؤں پر ہونے والے مظالم کے بدلے میں انڈیا اور بنگلہ دیش کی سیریز منسوخ کرنے کا مطالبہ کر دیا۔
ہندو جاناجگروتی سامیتھی تنظیم نے انڈین کرکٹ بورڈ (بی سی سی آئی) سے مطالبہ کیا ہے کہ جب تک بنگلہ دیش میں یہ مسئلہ حل نہیں ہوتا تب تک جمعرات سے چنئی میں کھیلے جانے والا ٹیسٹ میچ منسوخ کر دیا جائے۔
تنظیم نے اپنے بیان میں کہا کہ ’ہندو جاناجگروتی سامیتھی انڈیا اور بنگلہ دیش کے درمیان میچز کے انعقاد کی بھرپور مذمت کرتی ہے۔ یہ سیریز بنگلہ دیش میں ہونے والے مظالم کے باعث ہندوؤں کے زخم گہرے کر رہی ہے۔‘
خیال رہے کہ بنگلہ دیش کی سابق وزیراعظم شیخ حسینہ واجد کے مستعفی ہونے کے بعد بنگلہ دیش میں کئی روز تک سیاسی بحران جاری رہا۔
شیخ حسینہ واجد کے استعفے کے لیے چلائی جانے والے تحریک کے دوران ملک بھرمیں غیر معمولی تشدد کے واقعات سامنے آئے۔
دوسری جانب انڈیا اور بنگلہ دیش کے درمیان دو ٹیسٹ میچوں پر مشتمل سیریز کا پہلا میچ جمعرات سے چنئی میں کھیلا جائے گا۔
سیریز کا دوسرا میچ 27 ستمبر سے کانپور میں کھیلا جائے گا۔
دونوں ٹیموں کے درمیان یہ ٹیسٹ سیریز آئی سی سی ورلڈ ٹیسٹ چیمپئن شپ کا حصہ ہے۔
ٹیسٹ سیریز کے بعد دونوں ٹیمیں تین ٹی20 میچوں پر مشتمل سیریز کھیلیں گی۔