ویسٹ انڈیز کے جارح مزاج بلے باز نکولس پوران ٹی ٹوئنٹی کرکٹ میں ایک سال کے دوران سب سے زیادہ چھکے مارنے والے پہلے کھلاڑی بن گئے۔
نکولس پوران ایک کلینڈر ایئر میں ٹی 20 فارمیٹ میں سب سے زیادہ چھکے مارنے والے دنیا کے پہلے کرکٹر بن گئے ہیں۔ انہوں نے یہ کارنامہ گزشتہ روز کیریبیئن پریمیئر لیگ کے میچ میں سر انجام دیا۔ انہوں نے 43 گیندوں پر 93 رنز بنائے، جس میں 7 چھکے اور 6 چوکے شامل تھے۔
اس سے قبل ایک سال میں سب سے زیادہ چھکے لگانے کا ریکارڈ ان کے ہم وطن کرس گیل کے پاس تھا جنہوں نے 2015 میں 36 ٹی 20 اننگز میں 135 چھکے لگائے تھے لیکن پوران نے جاری سی پی ایل میں انہیں پیچھے چھوڑ دیا۔
میں سوشل میڈیا کا استعمال نہیں کرتا، شاہین شاہ آفریدی
نکولس پوران نے 2024 میں اب تک 63 ٹی ٹوئنٹی میچز میں 151 چھکے مارے ہیں جو دنیا میں کسی بھی بیٹر کے ایک سال میں اس فارمیٹ میں سب سے زیادہ چھکے ہیں۔
یاد رہے کہ 2015 میں نکولس پوران ٹریننگ سے واپسی پر کار حادثے میں زخمی ہوئے تھے جس کی وجہ سے ان کی ٹانگوں پر چوٹ آئی تھی اور وہ کئی ماہ تک کرکٹ سے دور رہے تھے اور اس وقت ان کی عمر صرف 19 سال تھی۔
نکولس پوران جاری کیریبین پریمیئر لیگ 2024 میں صرف سات میچز میں 275 رنز کے ساتھ ٹورنامنٹ کے تیسرے سب سے زیادہ رنز بنانے والے کھلاڑی ہیں۔ وہ اس ٹورنامنٹ میں اپنی ٹیم کے لیے اب تک 21 چھکے لگاچکے ہیں۔
ٹی ٹوئنٹی کرکٹ میں پوران 361 میچز میں 8 ہزار رنز اور 563 چھکوں کے ساتھ چوتھے نمبر پر ہیں، انہوں نے دو سنچریاں بھی بنا رکھی ہیں۔