اپوزیشن لیڈر عمر ایوب نے چیف الیکشن کمشنر اور ممبران کی تقرری کے لیے سپیکر قومی اسمبلی کو خط لکھ کر پارلیمانی کمیٹی بنانے کا مطالبہ کیا ہے۔
بدھ کو اپوزیشن لیڈر عمر ایوب نے نئے چیف الیکشن کمشنر کی تقرری کے لیے سپیکر قومی اسمبلی سردار ایاز صادق کو خط لکھا۔
خط میں انہوں نے کہا ہے کہ ’سکندر سلطان راجہ کی مدت 26 جنوری کو ختم ہو رہی ہے۔ نئے چیف الیکشن کمشنر کی تقرری میں شفافیت اور اتفاقِ رائے کو یقینی بنانے کے لیے پارلیمانی کمیٹی کا کردار اہم ہے۔‘
عمر ایوب نے کہا کہ ’جلد پارلیمانی کمیٹی تشکیل دے کر ایک غیر جانبدار شخص کو تعینات کیا جائے تاکہ الیکشن میں شفافیت پیدا کی جا سکے اور عوام کا اعتماد بحال ہو سکے۔‘
خط میں اپوزیشن لیڈر نے حکومت اور پارلیمنٹ سے مطالبہ کیا کہ اس معاملے میں تمام سیاسی جماعتوں سے مشاورت کی جائے تاکہ آئندہ انتخابات میں کسی قسم کی بے چینی یا تنازع پیدا نہ ہو۔
دوسری جانب سینیٹ میں قائد حزب اختلاف شبلی فراز نے بھی اس معاملے پر چیئرمین سینیٹ کو خط تحریر کیا ہے۔
خط کے متن میں کہا گیا ہے کہ ’آرٹیکل 215 کے تحت چیف الیکشن کمشنر سکندر سلطان کی مدت ختم ہو رہی ہے۔ آرٹیکل213 کے تحت آئینی تقاضا پورا کرنے کے لیے پارلیمانی کمیٹی تشکیل دی جائے۔‘
خیال رہے کہ چیف الیکشن کمشنر سکندر سلطان راجہ، ممبر سندھ اور بلوچستان 26 جنوری کو ریٹائر ہو رہے ہیں۔