چیمپئنز ٹرافی: ٹکٹوں کی قیمت کیا ہے اور کب دستیاب ہوں گی؟

آئی سی سی چیمپئنز ٹرافی 2025 کے گروپ میچز اور پہلے سیمی فائنل کے ٹکٹوں کی فروخت کا آغاز 28 جنوری سے ہورہا ہے۔

جنرل سٹینڈز کے ٹکٹ کی قیمت ایک ہزار روپے جبکہ پریمیئم سیٹیں مختلف کیٹگریز میں 15 سو روپے سے دستیاب ہوں گی۔

انٹرنیشنل کرکٹ کونسل (آئی سی سی) کا کہنا ہے کہ دبئی میں میچز کے ٹکٹس کے حوالے سے جلد آگاہ کیا جائے گا جبکہ فائنل کے ٹکٹس پہلے سیمی فائنل کے اختتام پر دستیاب ہونگے۔

چیف کمرشل آفیسر آئی سی سی انوراگ داھیا نے کہا ہے کہ ’پاکستان کے لیے اس ٹورنامنٹ کا انعقاد یادگار لمحہ ہے۔‘

ٹورنامنٹ کے ڈائریکٹر سمیر احمد سید کا کہنا ہے کہ ’آئی سی سی چیمپئنز ٹرافی شائقین کو بہترین کرکٹ کے ناقابل  فراموش لمحات فراہم کرے گی، نئے اپ گریڈ سٹیڈیمز میں شائقین کھیل کے خوبصورت لمحات سے پوری طرح لطف اندوز ہوسکیں گے۔‘

اپنی بات جاری رکھتے ہوئے ان کا مزید کہا تھا کہ ’والدین کے لیے یہ ایک بہترین موقع ہے کہ وہ اپنے بچوں کو اس کھیل سے روشناس کرائیں اور اس کھیل سے ان کی محبت میں اضافہ ہو۔‘

یاد رہے کہ چیمپئنز ٹرافی کا آغاز 19 فروری سے پاکستان اور نیوزی لینڈ کے درمیان میچ سے ہو گا جبکہ فائنل نو مارچ کو کھیلا جائے گا۔

ٹورنامنٹ میں مجموعی طور پر 15 میچز پاکستان کے تین شہروں کراچی، لاہور اور راولپنڈی سمیت یو اے ای کے شہر دبئی میں کھیلے جائیں گے۔

 

آئی سی سی چیمپئنز ٹرافی میں کل آٹھ ٹیمیں حصہ لیں گی جن میں پاکستان، آسٹریلیا، انگلینڈ، انڈیا، افغانستان، بنگلہ دیش، جنوبی افریقہ اور نیوزی لینڈ شامل ہیں۔

ان آٹھ ٹیموں کو دو گروپوں میں تقسیم کیا گیا ہے۔

گروپ اے میں میزبان پاکستان، انڈیا، نیوزی لینڈ اور بنگلہ دیش شامل ہیں۔

گروپ بی میں آسٹریلیا، انگلینڈ، افغانستان اور جنوبی افریقہ کو شامل کیا گیا ہے۔

ایونٹ میں شریک انڈین ٹیم اپنے تینوں گروپ میچ دبئی میں کھیلے گی جبکہ ٹورنامنٹ کا پہلا سیمی فائنل بھی دبئی میں کھیلا جائے گا۔

ٹورنامنٹ کا دوسرا سیمی فائنل اور فائنل لاہور میں شیڈول کیے گئے ہیں تاہم اگر انڈین ٹیم چیمپئنز ٹرافی کے فائنل میں پہنچتی ہے تو اس صورت میں فائنل میچ بھی دبئی میں کھیلا جائے گا۔