آئی سی سی چیمپئنز ٹرافی کے لیے لاہور کے اپ گریڈ ہونے والے قذافی سٹیڈیم کا افتتاح کر دیا گیا ہے۔
قذافی سٹیڈیم کا افتتاح پاکستان کے وزیراعظم محمد شہباز شریف نے جمعے کو کیا۔
افتتاحی تقریب میں وزیراعظم محمد شہباز شریف کے ساتھ صوبہ پنجاب کی وزیراعلٰی مریم نواز شریف اور چیئرمین پاکستان کرکٹ بورڈ (پی سی بی) محسن نقوی بھی شریک تھے۔
تقریب میں پاکستان کرکٹ ٹیم کے ساتھ ساتھ وفاقی وزراء اور دیگر حکومتی عہدیدار بھی موجود تھے۔
قذافی سٹیڈیم کو 117 دنوں میں آئی سی سی چیمپئنز ٹرافی کے لیے اپ گریڈ کیا گیا ہے۔
افتتاحی تقریب سے خطاب کرتے ہوئے وزیراعظم محمد شہباز شریف نے کہا کہ ’آج ہم سب کے لیے بڑی خوشی کا دن ہے کہ قذافی سٹیڈیم کی تعمیر نو بہت ہی شاندار طریقے سے مکمل ہوئی۔‘
انہوں نے مزید کہا کہ ’محسن نقوی کی نگرانی میں 117 دنوں میں جو ناممکن کام تھا وہ ممکن کر دکھایا۔ میں سب کو خراج تحسین پیش کرتا ہوں۔‘
وزیراعظم نے پاکستانی ٹیم سے بات کرتے ہوئے کہا کہ ’چیمپئنز ٹرافی آپ کی منتظر ہے۔ اللہ تعالیٰ آپ کی مدد کریں گے۔ آپ پوری قوم کے ہیروز ہوں گے۔ آپ 24 کروڑ عوام کے دل جیتیں گے۔ ہم سب آپ کے لیے دعا گو ہیں۔‘
شہباز شریف نے کپتان محمد رضوان اور بابر اعظم سے مخاطب ہوتے ہوئے کہا کہ ’آپ سے بہت توقعات ہیں۔‘
انہوں نے مزاحیہ انداز میں شاہین شاہ آفریدی سے اپنے سسر یعنی شاہد آفریدی کے نقش قدم پر چلنے کا بھی کہا۔
وزیراعظم نے انڈیا کے خلاف میچ کے بارے میں کہا کہ ’آپ ہمسایہ ملک کو شکست دے کر 24 کروڑ عوام کا دل جیتیں گے۔ دعا گو ہیں کہ ہماری ٹیم انڈیا کو شکست فاش دے۔‘
انہوں نے پاکستانی فاسٹ بولرز سے انڈیا کو ٹف ٹائم دینے کا بھی کہا۔
پاکستانی ٹیم کی نئی جرسی (شرٹ) ہلکے سبز رنگ کی تھیم پر بنائی گئی ہے (فوٹو: پی سی بی)
چیمپئنز ٹرافی کے لیے پاکستانی ٹیم کی نئی جرسی لانچ
اس تقریب کے دوران آئی سی سی چیمپئنز ٹرافی کے لیے پاکستانی ٹیم کی نئی جرسی بھی لانچ کی گئی۔
پاکستانی ٹیم کے کھلاڑی قذافی سٹیڈیم کے سٹیج پر کپتان محمد رضوان کی قیادت میں جمع ہوئے جہاں انہوں نے نئی جرسی کی نمائش کروائی۔
پاکستانی ٹیم کی نئی جرسی (شرٹ) ہلکے سبز رنگ کی تھیم پر بنائی گئی ہے جس میں گہری سبز دھاریاں بنی ہوئی ہیں۔
ٹیم کی جرسی کے درمیان میں ’پاکستان‘ لکھا گیا ہے جبکہ جرسی کے ایک جانب چیمپئنز ٹرافی جبکہ دوسری جانب ٹیم کا لوگو بنا ہوا ہے۔
اس نئی کٹ میں ٹراؤزر کا رنگ گہرا سبز ہے۔
جرسی کی رونمائی کی تقریب کے بعد لائٹ شو اور آتش بازی کا شاندار مظاہرہ کیا گیا۔
تقریب میں گلوکار عارف لوہار اور آئمہ بیگ نے اپنے فن کا مظاہرہ کیا جس سے شائقین خوب لطف اندوز ہوئے۔