بھارت کی کرکٹ ٹیم کے کپتان اور مایہ ناز بیٹر روہت شرما نے انگلینڈ کے خلاف سیریز کے دوسرے ون ڈے میچ میں شان دار سنچری بنا کر چمپیئنز ٹرافی سے قبل دیگر ٹیموں کے لیے خطرے کی گھنٹی بجائی اور ویسٹ انڈیز کے سابق جارح مزاج بلے باز کرس گیل کا ریکارڈ بھی توڑ دیا تاہم پاکستان کے سابق کپتان بدستور اس فہرست میں پہلے نمبر موجود ہیں۔
روہت شرما نے بھارتی ریاست اوڈیسا کے شہر کوٹیک میں انگلینڈ کے خلاف سیریز کے دوسرے میچ میں 305 رنز کے ہدف کے تعاقب میں 90 گیندوں پر 119 رنز بنائے اور طویل عرصے سے فارم حاصل کرنے کی جدوجہد میں کامیابی حاصل کی۔
بھارتی کپتان نے شبھمن گل کے ساتھ 16 اوورز میں 136 رنز کا شان دار آغاز فراہم کیا اور دونوں بیٹرز اس شراکت میں اپنی نصف سنچریاں بنائیں۔
روہت نے ابتدائی 6 اوورز کے کھیل میں 3 بلند وبالا چھکے لگائے اور اس کے ساتھ ہی ویسٹ انڈیز کے مشہور سابق بیٹر کرس گیل کا ایک روزہ کرکٹ میں 331 چھکے لگانے کا ریکارڈ توڑتے ہوئے انہیں پیچھے چھوڑ دیا۔
میچ کے آغاز سے قبل روہت شرما 331 چھکوں کے ساتھ کرس گیل کے برابر تھے اور انہیں اپنا ریکارڈ بہتر کرنے کے لیے صرف ایک چھکے کی ضرورت تھی جبکہ گیل نے 2019 میں کرکٹ سے کنارہ کشی سے قبل اپنے کیریئر میں یہ ریکارڈ بنایا تھا۔
خیال رہے کہ اس منفرد فہرست میں پاکستان کرکٹ ٹیم کے سابق کپتان اور مشہور آل راؤنڈر شاہد آفریدی بدستور پہلے نمبر پر موجود ہیں، انہوں نے 398 ون ڈے میچوں میں 351 چھکے لگا کر ریکارڈ قائم کیا ہوا ہے۔
شاہد آفریدی نے مارچ 2015 میں آسٹریلیا کے خلاف اپنے ایک روزہ کیریئر کا آخری میچ کھیلا تھا تاہم 10 سال گزرنے کے باوجود ان کا ریکارڈ بدستور قائم ہے تاہم روہت شرما اس ریکارڈ کو اپنے نام کرسکتے ہیں جنہوں نے کرکٹ سے ریٹائرمنٹ کا عندیہ فی الحال نہیں دیا حالانکہ وہ ٹی20 کرکٹ سے ریٹائر ہوچکے ہیں۔
ایک روزہ کرکٹ میں شاہد آفریدی کے بعد روہت شرما 338 چھکوں کے ساتھ دوسرے، کرس گیل 331، سری لنکا کے سنتھ جے سوریا 270، بھارت کے ایم ایس دھونی 229، انگلینڈ کے آئن مورگن 220، جنوبی افریقہ کے اے بی ڈی ولیئرز 204، نیوزی لینڈ کے برینڈن مک کولم 200، سچن ٹنڈولکر 195 اور بھارت کے ہی سارو گنگولی 190 چھکوں کے ساتھ بالترتیب سرفہرست 10 بیٹرز میں شامل ہیں۔