تحریک انصاف کے سات رکنی وفد نے چیف جسٹس یحییٰ آفریدی سے ملاقات کی جس میں بانی پی ٹی ائی کے کیسز پر بات ہوئی۔
چیف جسٹس سے ملاقات کے بعد میڈیا سے گفتگو کرتے ہوئے قومی اسمبلی میں اپوزیشن لیڈر عمر ایوب نے کہا کہ ہماری چیف جسٹس یحییٰ آفریدی سے ملاقات ہوئی، چیف جسٹس کو بتایا جیل مینوئل کی دھجیاں اڑائی جا رہی ہیں۔
انہوں نے کہا کہ ملاقات میں معیشت ، ملٹری کورٹس اور لاپتہ افراد کے حوالے سے بات ہوئی ، اس کے علاوہ پروڈکشن آرڈر پر عملدرآمد نہ ہونے کے حوالے سے بھی بات کی ، ہم نے اپنے وکلاء کو ملنے والی دھمکیوں کے حوالے سے چیف جسٹس کو آگاہ کیا۔
چیف جسٹس نے وزیر اعظم سے نظام انصاف میں بہتری لانے کیلئے تجاویز مانگ لیں
اس موقع پر چیئرمین پی ٹی آئی بیرسٹر گوہر نے کہا کہ ملاقات چیف جسٹس کی درخواست پر کی گئی ، چیف جسٹس نے نیشنل جوڈیشل پالیسی کمیٹی کی میٹنگ کے سلسلے میں ایجنڈا شیئر کیا ،چیف جسٹس نے 10 نکاتی ایجنڈے پر تجاویز مانگی تھیں۔
بیرسٹر گوہر نے کہا کہ چیف جسٹس کو کہا پی ٹی آئی کے ساتھ امتیازی سلوک کیا جاتاہے ، بانی پی ٹی آئی کی بچوں سے بات نہیں کرائی جاتی ،چیف جسٹس نے کہا ایسے اقدامات کروں گا جس سے مسائل کا حل نکلے۔
چیف جسٹس کا ہزارہ ڈویژن کے دور دراز علاقوں کے دورے کا اعلان
ان کا کہنا تھا کہ ملاقات میں چیف جسٹس کے سامنے بانی پی ٹی آئی کے کیسز پر بات ہوئی ، بانی پی ٹی آئی اور بشریٰ بی بی کے کیسز کی تاریخ اور ملاقات کا وقت تبدیل ہو جاتا ہے، چیف جسٹس کو بتایا کہ وکلاء کو بانی سے ملنے نہیں دیا جاتا۔
واضح رہے اس سے قبل وزیراعظم شہباز شریف اور چیف جسٹس کی ملاقات ہوئی تھی ۔ جس میں چیف جسٹس نے وزیر اعظم سے نظام انصاف میں بہتری کی تجاویز مانگ لی تھیں۔