معروف کمپنی کی جانب سے 2 منفرد لیپ ٹاپس متعارف کرائے گئے ہیں،
ان میں سے ایک لیپ ٹاپ کی بیٹری کو سولر پاور سےبھی چارج کیا جا سکتا ہے جبکہ دوسرا فولڈ ایبل اسکرین سے لیس ہے ۔
فی الحال یہ دونوں لیپ ٹاپس کانسیپٹ ماڈلز ہیں جس کا مطلب ہے کہ یہ بھی عام افراد کیلئے دستیاب نہیں ہیں ۔
چینی کمپنی کی جانب سے اکثر ایسے کانسیپٹ لیپ ٹاپس متعارف کرائے جاتے ہیں جیسے کچھ عرصے قبل اس نے رول ایبل لیپ ٹاپ بھی پیش کیا تھا جس کی اسکرین اوپر کی جانب کھلتی تھی۔
چینی کمپنی نے فولڈ ایبل اسکرین سے لیس تھنک بک فلپ لیپ ٹاپ متعارف کرایا ہے۔ جب اس لیپ ٹاپ کو مکمل طور پر ان فولڈ کیا جاتا ہے تو اس کی اسکرین 18 انچ کی ہو جاتی ہے۔ اس کے ڈسپلے کو درمیان سے فولڈ کرکے 2 اسکرینیں بھی بنائی جاسکتی ہیں جن میں سے ایک فرنٹ پر نظر آتی ہے جبکہ دوسری پشت پر چلی جاتی ہے۔ اسی طرح پورے ڈسپلے کو مکمل فولڈ کرکے اس لیپ ٹاپ کو ٹیبلیٹ جیسی ڈیوائس میں تبدیل کیا جاسکتا ہے۔
کمپنی کا کہنا ہے کہ اس فولڈ ایبل لیپ ٹاپ کو عام افراد کے لیے متعارف کرانے کے لیے ابھی کافی کام کرنا ہوگا۔
اس کے علاوہ کمپنی نے ایک یوگا سولر نامی کانسیپٹ لیپ ٹاپ بھی پیش کیا گیا۔ اس لیپ ٹاپ کے بیک پر سولر پینلز نصب ہیں جو سورج کی روشنی کو جذب کرسکتے ہیں۔
ویسے تو یہ لیپ ٹاپ روایتی چارجر ہی زیادہ کام کرے گا مگر سولر پاور سے صارفین اسے اس وقت زیادہ استعمال کرسکیں گے جب ان کے اردگرد کوئی چارجنگ پوائنٹ نہیں ہوگا البتہ سورج کی روشنی ضرور دستیاب ہوگی۔
کمپنی کی جانب سے دعویٰ کیا گیا ہے کہ لیپ ٹاپ صارف کے اردگرد موجود عام روشنی بھی جذب کرکے بیٹری لائف کو ایک گھنٹے تک بڑھا دے گا۔