سعودی وزارت حج و عمرہ کی جانب سے عمرہ زائرین کو مسجد الحرام میں داخل ہونے اور باہر نکلنے سے متعلق اہم ہدایات جاری کر دیں۔
سعودی خبر رساں ادارے کی رپورٹ کے مطابق وزارت کا کہنا تھا کہ زائرین مسجد میں داخل ہونے اور باہر نکلنے کے لیے مخصوص دروازے استعمال کریں۔ اس سے ہجوم کے نظم و نسق میں مدد ملتی ہے اور عمرہ زائرین و نمازیوں کے لیے عبادات کی ادائیگی کو آسان بنایا جاتا ہے۔
سعودی وزارت حج و عمرہ کی جانب سے وضاحت کی گئی کہ دروازوں کی تخصیص کا مقصد بھیڑ اور دھکم پیل کو کم کرنا اور حرم شریف کے اندر نقل و حرکت کی روانی کو برقرار رکھنا ہے۔
عمرہ زائرین کو مسجد الحرام کے باہر سمارٹ لاکرز کی سہولت دے دی گئی
یہ اقدام زائرین کی سلامتی کو یقینی بنانے اور ان کے روحانی سفر کو سہل بنانے کے لیے کی جانے والی مسلسل کوششوں کا حصہ ہے۔
یاد رہے کہ سعودی عرب میں ادارہ شماریات کا کہنا ہے کہ سال 2023 کے مقابلے میں 2024 کی چوتھی سہہ ماہی کے دوران زائرین کی تعداد میں 31 فیصد اضافہ ریکارڈ کیا گیا۔
ادارہ شماریات نے کہا ہے کہ گزشتہ برس مملکت آنے والے عمرہ زائرین کی مجموعی تعداد 35.8 ملین رہی جوکہ سابقہ برسوں کے مقابلے میں 26 فیصد زائد ہے۔