وزیراعظم شہباز شریف نے کہا ہے کہ پاکستانی کی مسلح افواج نے دشمن کے فوجی ڈھانچے کو فیصلہ کن نقصان پہنچا کر پاکستان کے عزمِ صمیم کو ایک بار پھر واضح کر دیا کہ ہم اپنی خودمختاری اور علاقائی سالمیت کے تحفظ پر کسی قسم کا سمجھوتہ نہیں کریں گے۔افواج پاکستان کے شعبہ تعلقات عامہ کی جانب سے جاری بیان کے مطابق وزیرِاعظم پاکستان شہباز شریف نے نائب وزیرِاعظم و وزیرِ خارجہ، وزیرِ دفاع، وزیرِ منصوبہ بندی و ترقی، وزیرِ اطلاعات، چیف آف آرمی اسٹاف جنرل سید عاصم منیر اور چیف آف دی نیول اسٹاف کے ہمراہ پاکستان ایئر فورس کے آپریشنل بیس کامرہ کا دورہ کیا۔اس موقع پر اپنے خطاب میں وزیراعظم نے کہا کہ ’بلااشتعال جارحیت کے پیشِ نظر پاکستان کی مسلح افواج نے مثالی تحمل، تزویراتی بصیرت اور آپریشنل درستگی کا مظاہرہ کیا۔
وزیر اعظم نے کہا کہ پوری قوم اپنی مسلح افواج کی بہادری پر فخر کرتی ہے۔
’چیف آف آرمی اسٹاف کی قیادت میں ہمارے محافظوں نے ایک بار پھر ثابت کر دیا کہ پاکستان کی سلامتی ناقابلِ تسخیر ہے، اور کسی بھی جارحیت کا جواب طاقتور، پُرعزم، اور بے لچک انداز میں دیا جائے گا۔‘وزیرِاعظم نے پاکستان نے ایئر چیف مارشل ظہیر احمد بابر سدھو کی قیادت کو خراجِ تحسین پیش کیا اور پی اے ایف کو جدید تقاضوں سے ہم آہنگ کرنے میں ان کے کلیدی کردار اور جدید ٹیکنالوجیز کے مؤثر انضمام کو سراہا، جس سے فورس کی آپریشنل صلاحیتوں میں نمایاں بہتری آئی ہے۔حکومت اور قوم کے اجتماعی عزم کا اعادہ کرتے ہوئے وزیرِاعظم نے کہا پاکستان کی مسلح افواج مکمل طور پر تیار اور ہر انچ زمین کے دفاع کے لیے پُرعزم ہیں۔’کسی بھی قسم کی جارحیت کا بروقت، متناسب اور فیصلہ کن جواب دیا جائے گا۔ ہم دفاعِ وطن کے لیے متحد، چوکس، اور غیر متزلزل ہیں۔‘آئی ایس پی آر کے مطابق دورے کے دوران وزیرِاعظم کو پاکستان ایئر فورس کی آپریشنل تیاریوں اور جنگی صلاحیتوں پر جامع بریفنگ دی گئی۔وزیرِاعظم نے پائلٹس، انجینئرز اور تکنیکی عملے سمیت فرنٹ لائن اہلکاروں سے ملاقات کی اور ان کی پیشہ ورانہ مہارت، درستگی، اور قومی دفاع سے غیر متزلزل وابستگی کو سراہا۔