سیشن کورٹ لاہور نے سابق صدر عارف علوی کے خلاف مقدمہ اندراج کے لیے دائر کردہ درخواست مسترد کردی۔
ایڈیشنل سیشن جج نے شہری شہزادہ عدنان کی درخواست پر محفوظ فیصلہ سنادیا۔ عدالت نے فیصلے میں باور کرایا کہ سوشل میڈیا کے بارے میں حکومت نے این سی سی آئی اے ادارہ قائم کیا ہے۔ درخواست گزار نیشنل سائبر کرائم انوسٹی گیشن ایجنسی سے رجوع کرسکتا ہے۔
شہری نے سابق صدر مملکت کے خلاف مقدمہ اندراج کے لیے عدالت سے رجوع کیا تھا اور درخواست میں نشاندہی کی تھی کہ سابق صدر نے گستاخانہ الفاظ کا استعمال کیا ہے۔ اس لیے ان کے خلاف مقدمہ اندراج کے لیے پولیس کو درخواست دی تاہم پولیس مقدمہ درج نہیں کر رہی۔ درخواست میں استدعا کی گئی تھی کہ پولیس کو مقدمہ درج کرنے کا حکم دیا جائے۔