پنجاب میں مون سون بارشوں کے ایک اور اسپیل کے پیش نظر دریاؤں میں پانی کے اضافے اور ممکنہ سیلاب کے خدشے پر فلڈ ایڈوائزری جاری کر دی گئی ہے۔
ترجمان پی ڈی ایم اے کے مطابق مون سون بارشوں کا ساتواں اسپیل 13 اگست سے شروع ہوگا جس کے باعث دریائے ستلج، راوی، چناب، جہلم اور ملحقہ ندی نالوں میں پانی کی سطح میں خطرناک حد تک اضافہ ممکن ہے۔
کمشنرز، ڈپٹی کمشنرز اور متعلقہ محکموں کو ہنگامی صورتحال کے لیے الرٹ رہنے کی ہدایت جاری کر دی گئی ہے۔ ڈی جی پی ڈی ایم اے پنجاب عرفان علی کاٹھیا نے کہا کہ دریاؤں کے پاٹ میں موجود مکانات اور مویشیوں کا بروقت انخلا یقینی بنایا جائے۔
انہوں نے واضح کیا کہ دریاؤں، نہروں، ندی نالوں اور تالابوں میں نہانے پر مکمل پابندی ہوگی جبکہ شہری کسی بھی ایمرجنسی کی صورت میں پی ڈی ایم اے ہیلپ لائن 1129 پر رابطہ کریں۔
پی ڈی ایم اے نے عوام کو ہدایت دی ہے کہ بارشوں کے دوران احتیاطی تدابیر اختیار کریں اور ممکنہ خطرات سے محفوظ رہنے کے لیے حکومتی ہدایات پر عمل کریں۔