کراچی میں بارش کے بعد بجلی کی طویل بندش نے شہریوں کو شدید مشکلات میں ڈال دیا کئی علاقوں میں 16 گھنٹے سے زائد وقت گزر جانے کے باوجود بجلی بحال نہیں ہوسکی۔
بارش کے بعد پیدا ہونے والی حبس کی صورتحال کے باعث شہری گرمی سے بے حال ہیں۔ گزشتہ روز سے ہونے والی بارش کے بعد کراچی کے 550 فیڈرز متاثر ہوئے جبکہ مختلف علاقوں میں بجلی بندش کا سلسلہ مسلسل جاری ہے۔
ترجمان کے الیکٹرک کے مطابق کراچی میں 2100 میں سے 1550 سے زائد فیڈرز سے بجلی کی فراہمی بحال ہے۔
علاقہ مکینوں کا کہنا ہے کہ بارش رکے کئی گھنٹے ہوچکے مگر عملہ فالٹ درست کرنے کے لیے نہیں پہنچا۔ بجلی کی بندش کے ساتھ ساتھ شہر میں انٹرنیٹ اور موبائل فون سروس بھی متاثر ہورہی ہے جس سے عوام کی مشکلات مزید بڑھ گئی ہیں۔