وزیراعظم شہباز شریف تین ملکی دورے پر روانہ ہو گئے، وزیراعظم شہباز شریف سعودی ولی عہد شہزادہ محمد بن سلمان کی دعوت پر پہلے مرحلے میں سعودی عرب جائیں گے۔ وزیراعظم کے ہمراہ کابینہ کے ارکان بھی موجود ہیں جن میں نائب وزیراعظم و وزیر خارجہ اسحاق ڈار، وزیر دفاع خواجہ آصف، وزیر خزانہ محمد اورنگزیب، وزیر اطلاعات عطا تارڑ، وزیر ماحولیات مصدق ملک اور معاون خصوصی طارق فاطمی شامل ہیں۔
وزیراعظم آفس کے مطابق دورے کے دوران وزیراعظم شہباز شریف سعودی ولی عہد اور دیگر اعلیٰ قیادت سے ملاقاتیں کریں گے جس میں دو طرفہ تعاون کے نئے مواقع اور علاقائی و عالمی امور پر بھی بات چیت ہوگی۔ دفتر خارجہ کا کہنا ہے کہ یہ دورہ دونوں ممالک کے درمیان منفرد شراکت داری کو مزید مضبوط بنانے میں معاون ثابت ہوگا۔
ذرائع کے مطابق وزیراعظم سعودی عرب کے بعد برطانیہ روانہ ہوں گے جہاں وہ دو روز قیام کریں گے اور برطانوی حکام کے ساتھ ملاقاتیں کریں گے۔
ذرائع کا کہنا ہے کہ وزیراعظم 21 ستمبر کو امریکا روانہ ہوں گے جہاں وہ اقوام متحدہ کی جنرل اسمبلی کے اجلاس میں شرکت کریں گے۔ وہ 22 ستمبر کو فلسطین کے دو ریاستی حل پر سربراہی کانفرنس میں بھی شرکت کریں گے جبکہ 26 ستمبر کو جنرل اسمبلی سے خطاب کریں گے۔ وزیراعظم 27 ستمبر کو امریکا سے براستہ برطانیہ وطن واپس روانہ ہوں گے اور 29 ستمبر کو پاکستان پہنچیں گے۔