Getty Imagesمتحدہ عرب امارات کے خلاف ناک آؤٹ میچ سے قبل پاکستان کی طرف سے پریس کانفرنس منسوخ کی گئی مگر پاکستانی کھلاڑیوں نے منگل کی شب ٹریننگ سیشن میں حصہ لیا
ایشیا کپ کے اہم میچ میں پاکستان نے متحدہ عرب امارات کے خلاف ٹاس جیت کر پہلے بولنگ کا فیصلہ کیا ہے اور اسی طرح یہ بات بھی واضح ہو گئی ہے کہ ٹورنامنٹ میں پاکستان اپنا سفر جاری رکھے گا۔
اس سے قبل اس میچ کے انعقاد میں ایک گھنٹے کی تاخیر دیکھنے میں آئی تھی جس کی وجہ پاکستان کرکٹ بورڈ (پی سی بی) کے ترجمان عامر میر نے بورڈ اور آئی سی سی کے حکام کے درمیان مذاکرات بتائی تھی۔
ان مذاکرات کا سبب ’نو ہینڈ شیک‘ تنازعہ تھا۔
اب پی سی بی نے دعویٰ کیا ہے کہ آئی سی سی کے میچ ریفری اینڈی پائیکرافٹ نے اس معاملے پر پاکستان کرکٹ ٹیم کے مینجر اور کپتان سے معذرت کر لی ہے تاہم آئی سی سی کی جانب سے اس معاملے پر تاحال کوئی تبصرہ نہیں کیا گیا۔
خیال رہے پی سی بی نے دعویٰ کیا تھا کہ اتوار کو پاکستان اور انڈیا کے درمیان میچ سے قبل میچ ریفری اینڈی پائیکرافٹ نے دونوں ٹیموں کے کپتانوں سے مصافحہ نہ کرنے کی درخواست کی تھی۔
چیئرمین پی سی بی محسن نقوی کا کہنا تھا کہ پاکستان نے آئی سی سی سے میچ ریفری کی شکایت کی اور ان پر آئی سی سی کے ضابطہ اخلاق اور ایم سی سی کے کھیل کی روح کے حوالے سے قوانین کی خلاف ورزی کے الزامات عائد کیے ہیں۔
پی سی بی کے مطابق اینڈی پائیکرافٹ کا کہنا ہے کہ انڈیا اور پاکستان کے درمیان میچ کے دوران ہونے والا واقعہ ’رابطے کے فقدان‘ کے سبب پیش آیا اور انھوں نے اس پر ’معذرت‘ بھی کی ہے۔
پی سی بی کا کہنا ہے کہ ’آئی سی سی نے 14 ستمبر کو میچ کے دوران کوڈ آف کنڈکٹ کی خلاف ورزی کی انکوائری پر بھی آمادگی کا اظہار کیا۔‘
اس سے قبل پاکستان نے میچ ریفری کو فوراً ایشیا کپ سے ہٹانے کا مطالبہ کیا تھا۔
کرکٹ ویب سائٹ کرک انفو کے مطابق متحدہ عرب امارات کے خلاف ناک آؤٹ میچ سے قبل پاکستان کی طرف سے پریس کانفرنس منسوخ کی گئی تھی مگر پاکستانی کھلاڑیوں نے منگل کی شب ٹریننگ سیشن میں حصہ لیا تھا۔
ترجمان پی سی بی عامر میر نے میچ سے قبل کہا تھا کہ ایشیا کپ میں کھیل جاری رکھنے کے حوالے سے بورڈ نے ابھی تک کوئی حتمی فیصلہ نہیں کیا تاہم اب پاکستان اور متحدہ عرب امارات کے درمیان میچ دبئی انٹرنیشنل سٹیڈیم میں جاری ہے۔
Reutersپاکستان کرکٹ بورڈ کا دعویٰ ہے کہ میچ ریفری نے دونوں کپتانوں سے ٹاس کے وقت ہاتھ نہ ملانے کی درخواست کی تھی’نو ہینڈ شیک‘ اور پاکستان کا احتجاج
اتوار کو دبئی میں پاکستان اور انڈیا کے درمیان ایشیا کپ کے میچ میں کچھ ایسا ہوا جس نے سیاسی، سفارتی اور عسکری محاذوں پر موجود تناؤ کو کھیل کے میدان میں بھی پھیلا دیا۔
میچ میں انڈیا کے ہاتھوں پاکستان کی شکست کے بعد جہاں ایک طرف تو پاکستان کی ناقص کارکردگی موضوع بحث رہی وہیں اس میچ میں ’سپورٹس مین سپرٹ‘ کا فقدان بھی شائقین کی نظروں سے بچ نہ سکا۔
اس میچ کے آغاز سے قبل روایت کے مطابق دونوں ٹیمیں میدان میں آئیں۔ قومی ترانے بجے اور پھر ٹاس ہوا لیکن ٹاس کے بعد انڈین کپتان سوریا کمار یادو نے اپنے پاکستانی ہم منصب سلمان علی آغا سے ہاتھ ملانے کے بجائے میدان سے باہر جانے کا فیصلہ کیا۔
Getty Imagesمیچ جیتنے کے بعد انڈین بلے باز پاکستانی کھلاڑیوں سے ہاتھ ملائے بغیر ہی میدان سے چلے گئے
بات یہیں تک نہ رہی اور میچ ختم ہونے کے بعد بھی انڈین بلے باز میدان میں موجود پاکستانی کھلاڑیوں سے ہاتھ ملائے بغیر ہی چل دیے۔
اگر صرف کھیل کی بات کی جائے اس میچ پر انڈیا کی گرفت شروع سے ہی مضبوط رہی اور اس نے یہ مقابلہ باآسانی سات وکٹوں سے جیتا۔
انڈیا پاکستان کرکٹ میچ: ان ’ٹاکروں‘ میں اب مقابلے نامی کوئی شے ہی نہیں بچیپاکستان اور انڈیا کے درمیان ایشیا کپ کے یادگار مقابلے: جب آفریدی کے دو چھکوں نے پانسا پلٹ دیاحریفوں کے لیے ’ناقابلِ پیش گوئی‘ بنتا پاکستان’کیا کرکٹ اور خون اکٹھے بہہ سکتے ہیں؟‘
اس رویے کا نوٹس جہاں سوشل میڈیا پر لیا گیا اور ’نو ہینڈ شیک‘ کا ٹرینڈ چلتا رہا وہیں پاکستان نے انڈین ٹیم کے اس ’نامناسب‘ رویے پر باقاعدہ احتجاج بھی کیا ہے۔
پاکستانی ٹیم کے مینیجر نوید اکرم چیمہ کا کہنا تھا کہ ٹاس کے وقت تو میچ ریفری اینڈی پائیکرافٹ نے کپتانوں سے ہاتھ نہ ملانے کی درخواست کی تھی اور انھوں نے ریفری کے اس رویے پر باقاعدہ احتجاج ریکارڈ کروایا۔
پاکستانی ٹیم کے مینیجر نے انڈین کھلاڑیوں کے ہاتھ نہ ملانے کو سپورٹس مین سپرٹ کے خلاف قرار دیا۔ ان کا یہ بھی کہنا ہے کہ پاکستانی کپتان سلمان علی آغا نے انڈین کھلاڑیوں کے اس رویے کے خلاف احتجاجاً اختتامی تقریب میں شرکت نہیں کی۔
ادھر پاکستانی ٹیم کے ہیڈ کوچ مائیک ہیسن نے کہا کہ ’انڈین ٹیم نے جو حرکت کی اس پر پاکستانی ردعمل فطری تھا۔‘
ان کا کہنا تھا کہ ہم میچ کے بعد ہاتھ ملانے کے لیے تیار تھے، ہمیں مایوسی ہوئی کہ ہمارے مخالفین نے ایسا نہیں کیا۔
ہیسن نے کہا کہ ’ہم ہاتھ ملانے کے لیے آگے بڑھے لیکن تب تک وہ ڈریسنگ روم میں جا چکے تھے۔ یہ میچ کا مایوس کن اختتام تھا۔ ہم اپنے کھیل سے پہلے ہی مایوس تھے لیکن ہم مصافحہ کرنے کے لیے تیار تھے۔‘
Getty Imagesپاکستانی ٹیم کے مینیجر نے انڈین ٹیم کے رویے کے خلاف احتجاج کیا ہےانڈیا اور پاکستان کے درمیان کشیدگی پر تبصرے
پاکستانی کرکٹ ٹیم کے سابق کپتان راشد لطیف نے ایکس پر اپنے پیغام میں انڈین ٹیم کو مخاطب کرتے ہوئے کہا ’ہاں آپ دنیا کی بہترین ٹیم ہیں لیکن کھیل کے اختتام پر ہاتھ نہ ملانا، آپ کا اصل رنگ ظاہر کرتا ہے۔ پاکستانی کھلاڑی منتظر رہے لیکن انڈین کھلاڑی ڈریسنگ روم میں چلے گئے۔ آئی سی سی کہاں ہے؟‘
پاکستان کے فاسٹ بولر شعیب اخترنے بھی انڈین ٹیم کے ہاتھ نہ ملانے کے فیصلے کو ’سپورٹس مین سپرٹ‘ یعنی کھیل کی روح کے منافی قرار دیا۔
ان کا کہنا تھا کہ ’آپ نے بہت اچھی پرفارمنس دی لیکن یہ کرکٹ میچ ہے، اس میں سیاست نہیں لائی جانی چاہیے۔ آپ کو ہاتھ ملانا چاہیے۔۔۔ کچھ شائستگی کا مظاہرہ کرنا چاہیے، لڑائیاں ہوتی ہیں، گھروں میں ہوتی ہیں لیکن اس کا مطلب یہ نہیں کہ ہم ہاتھ نہیں ملاتے۔‘
جہاں پاکستان کرکٹ کے مداح پاکستان کی کار کردگی سے مایوس وہیں انڈین نہ صرف میچ کے نتیجے پر خوش ہیں بلکہ انڈین ٹیم کے ہاتھ نہ ملانے کے فیصلے کو بھی سراہ رہے ہیں اور اسے بھی پاکستانی ٹیم کی ہزیمت کہہ رہے ہیں۔
پاکستان کے خلاف انڈیا کی جیت پر ایک پاکستانی کرکٹ فین نے انڈین خبر رساں ادارے اے این آئی سے بات کرتے ہوئے کہا: 'وہ ہمیں کب مایوس نہیں کرتے؟۔۔۔ ہم صرف اپنی ٹیم کی حوصلہ افزائی کر سکتے ہیں، اس کے علاوہ ہم کچھ نہیں کر سکتے، ہم یہاں آئے اور اپنی ٹیم کو چیئر کرنے کے لیے پیسے خرچ کیے، بدلے میں انھیں ہمیں کچھ دینا تھا۔۔۔وہ برسوں سے پریکٹس کر رہے ہیں، اگر یہ پریکٹس کی بات ہوتی تو وہ جیت جاتے۔ یہ چاہت اور اعتماد کی بات ہے۔'
Getty Images
بہت سے لوگ شعیب اختر کے ایک کلپ کو شيئر کر رہے ہیں جس میں وہ یہ کہتے سنے جاتے ہیں کہ 'کرکٹ کو کرکٹ ہی رہنے دو اسے سیاسی نہ بناؤ۔ ہم لوگ آپ کی تعریف کر رہے ہیں ناں، آپ نے بہت اچھا کھیلا۔ ویل ڈن۔'
لایل سچ فین نامی ایک صارف نے شعیب اختر کی کلپ کو شیئر کرتے ہوئے لکھا: ' شعیب اختر ہینڈ شیک معاملے پر روتے ہوئے۔۔۔ یہ وہی آدمی ہے جو کچھ ماہ قبل عاصم منیر کے ساتھ، شاہد آفریدی کے ساتھ دیکھا گیا تھا۔ شاباش سوریہ کمار یادیو نے بھت اچھا کیا۔ چھوٹی بہت گہری لگی ہے جیسے نور خان ایئر بیس کو لگی تھی۔'
'روج روج کے کلیش' نامی ایک صارف نے لکھا: ' کیا میچ رہا، کپتان (سوریہ کمار) نے دبا دیااور نو ہینڈ شیک کا فیصلہ تو ماسٹر سٹروک! اس کا اختتام خالص سنیمائی تھا، پوری پاکستانی ٹیم انتظار کر رہی تھی۔۔۔ اور پھر دھڑام سے دروازہ ان کے منھ پر بند کر دیا گیا کیمرہ مین اس شاٹ کے لیے ایوارڈ کا مستحق ہے!'
کانگریس کی رکن اور میڈیا چیئرپرسن سوپریہ شرینیت نے 'نو ہینڈ شیک' پر جاری بحث کا ذکر کرتے ہوئے لکھا کہ 'بس کریں، یہ ملک بے وقوفوں کا نہیں ہے۔'
ان کے ٹویٹ کے جواب میں ایک صارف ونے وشواکرما نے لکھا: 'واضح رہے کہ انڈین کھلاڑیوں نے بھی میچ کا بائیکاٹ کیا تھا لیکن اوپر سے یہ میچ کھیلنے کا حکم دیا گیا ہے۔ میچ کے بعد انھوں نے حقیقت صاف کردی کہ انھیں شہدا یاد ہیں۔'
پاکستان اور انڈیا کے درمیان ایشیا کپ کے یادگار مقابلے: جب آفریدی کے دو چھکوں نے پانسا پلٹ دیا’کیا کرکٹ اور خون اکٹھے بہہ سکتے ہیں؟‘ پاکستان سے میچ نہ کھیلا تو ٹورنامنٹ سے باہر ہو جائیں گے: بی جے پی رُکن پارلیمنٹ انوراگ ٹھاکرحریفوں کے لیے ’ناقابلِ پیش گوئی‘ بنتا پاکستانمسلمانوں کی سرپرستی سے چمکنے والا کرکٹ سٹار ’لالا امرناتھ‘: ’وہ لڑکا لاہور کی سڑکوں سے اٹھا اور شہزادوں کے ساتھ چلنے لگا‘جب افغانستان کو ایشیا کی ’دوسری بہترین ٹیم‘ قرار دیے جانے پر پاکستانی کپتان مسکرا دیے