ایف آئی اے اسٹیٹ بینک سرکل نے کراچی کے علاقے سہراب گوٹھ میں کارروائی کرتے ہوئے غیر قانونی کرنسی ایکسچینج میں ملوث ملزم محمد اکبر کو گرفتار کرلیا۔
کارروائی کے دوران ملزم سے 70 لاکھ روپے مالیت کی ملکی و غیر ملکی کرنسی برآمد ہوئی جن میں 13 ہزار امریکی ڈالر، 8 ہزار سعودی ریال، 1556 یو اے ای درہم، 7 ہزار انڈونیشین روپیہ، ایک ہزار یمنی ریال، 318 عمانی ریال اور 305 چائینیز یوآن شامل ہیں۔ اس کے علاوہ 1,74,610 افغانی، یورو، عراقی دینار، ترکش لیرا اور 40 لاکھ ایرانی ریال بھی ضبط کرلیے گئے۔
ایف آئی اے حکام کے مطابق ملزم سے 15 لاکھ پاکستانی روپے اور 5 موبائل فونز بھی برآمد ہوئے اور کرنسی ایکسچینج کے غیر قانونی کاروبار سے متعلق ریکارڈ بھی ملا ہے۔
ابتدائی تحقیقات میں معلوم ہوا ہے کہ ملزم بغیر کسی لائسنس کے کرنسی کا کاروبار کر رہا تھا اور برآمد ہونے والی بھاری رقم کے حوالے سے حکام کو مطمئن بھی نہ کرسکا۔ ایف آئی اے نے مزید تفتیش شروع کردی ہے۔