پاکستان کی سکیورٹی فورسز نے بدھ کو خیبر پختونخوا کے ضلع ڈیرہ اسماعیل خان کے علاقے درابن میں خفیہ اطلاعات کی بنیاد پر آپریشن کیا، جس میں 13 ’دہشت گرد‘ ہلاک کر دیے گئے۔فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق کارروائی مخصوص انٹیلیجنس معلومات پر کی گئی، جس میں خوارج کے ٹھکانے کو مؤثر طور پر نشانہ بنایا گیا۔
بیان میں بتایا گیا ہے کہ ہلاک ہونے والے دہشت گرد مختلف تخریبی کارروائیوں میں ملوث رہے ہیں، جن میں دسمبر 2023 میں درابن میں ہونے والے خودکش حملے کی سہولت کاری، سرکاری اہلکاروں اور معصوم شہریوں کی ٹارگٹ کلنگ اور اغوا شامل ہیں۔ سکیورٹی فورسز نے ہلاک دہشت گردوں سے اسلحہ اور گولہ بارود بھی برآمد کیا۔
آئی ایس پی آر کے مطابق، علاقے میں مزید ممکنہ دہشت گردوں کی موجودگی کے پیش نظر کلیئرنس آپریشن جاری ہے۔دوسری جانب، وزیراعظم محمد شہباز شریف نے درابن میں 13 دہشت گردوں کی ہلاکت پر سکیورٹی فورسز کو خراجِ تحسین پیش کیا ہے۔وزیراعظم نے اپنے بیان میں کہا کہ ملک سے دہشت گردی کے مکمل خاتمے کے لیے تمام حکومتی ادارے پوری طرح متحرک اور یکسو ہیں۔