امریکی صدر کا برطانوی وزیراعظم کو فون: ’بائیڈن سے بات کر کے اچھا لگا‘

اردو نیوز  |  Jan 24, 2021

امریکی صدر جو بائیڈن نے برطانوی وزیراعظم کے ساتھ ٹیلی فونک گفتگو میں تعلقات کو مضبوط بنانے اور موسمیاتی تبدیلیوں سے نمٹنے کے لیے تعاون پر بات چیت کی ہے۔

خبر رساں ادارے اے ایف پی کے مطابق جو بائیڈن کے صدر بننے کے بعد دونوں سربراہوں کے درمیان یہ پہلی ٹیلی فونک گفتگو تھی۔ دونوں رہنماؤں نے دو طرفہ تعلقات، پیرس معاہدے اور کورونا وائرس سے نمٹنے پر تبادلہ خیال کی۔

برطانوی اخبار ٹیلی گراف نے رپورٹ کیا ہے کہ جانسن پہلے یورپی رہنما ہیں جنہیں نئے امریکی صدر جو بائیڈن کی جانب سے فون کال موصول ہوئی۔

صدر جو بائیڈن نے ان سے پہلے کینیڈا کے وزیراعظم اور میکسیکو کے صدر سے بات کی تھی۔

حلف اٹھانے کے بعد صدر جوبائیڈن نے پہلی بات چیت کینیڈا کے وزیراعظم سے کی تھی، کسی عالمی رہنما کو یہ ان کا پہلا فون تھا۔

برطانوی وزیراعظم بورس جانسن نے فون پر بات کرنے کی ایک تصویر ٹوئٹر پر شیئر کی اور لکھا کہ ’آج شام صدر جو بائیڈن سے بات کر کے اچھا لگا۔‘

اس گفتگو سے ظاہر ہو رہا ہے کہ سرد مہری کے شکار تعلقات کو بہتر بنایا جا رہا ہے،  جوبائیڈن نے 2019 میں بورس جانسن کو سابق امریکی صدر ڈونلڈ ٹرمپ کا ’جسمانی اور جذباتی چربہ‘ قرار دیا تھا۔ انہوں نے برطانوی وزیراعظم کی بریگزٹ پالیسی پر بھی تنقید کی تھی۔

ڈاؤننگ سٹریٹ کے بیان میں کہا گیا ہے کہ ’دونوں رہنماؤں نے دونوں ملکوں کے درمیان آزادانہ تجارت کے ممکنہ فوائد پر تبادلہ خیال کیا۔‘

Great to speak to President @JoeBiden this evening. I look forward to deepening the longstanding alliance between our two countries as we drive a green and sustainable recovery from COVID-19. pic.twitter.com/Y4P3G74PPz

— Boris Johnson (@BorisJohnson) January 23, 2021

برطانوی وزیراعظم نے کہا ہے کہ وہ امریکہ کے ساتھ موجودہ تجارت کے مسائل کو ’جلد سے جلد‘ حل کرنا چاہتے ہیں۔

برطانوی وزیراعظم بورس جانسن نے جو بائیڈن کی جانب سے سابق امریکی صدر کے فیصلوں کو واپس لینے کے اقدام کو سراہا۔

بیان میں مزید کہا گیا ہے کہ برطانوی وزیراعظم نے موسمیاتی تبدیلی سے متعلق پیرس معاہدے اور عالمی ادارہ صحت میں امریکی کی دوبارہ شمولیت کا بھی ’پرجوش خیرمقدم‘ کیا۔

دونوں سربراہوں نے اس امید کا اظہار کیا کہ وہ بہت جلد ملاقات کریں گے اور اقوام متحدہ کے عالمی موسمیاتی تبدیلی کے سمٹ کے لیے اکھٹے کام کریں گے۔

یہ سمٹ سکاٹ لینڈ میں نومبر میں منعقد ہوگا۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More