ویرات کوہلی کا ٹیسٹ کرکٹ سے اچانک ریٹائرمنٹ کا اعلان۔۔ وائرل پوسٹ نے مداحوں کو دکھی کردیا

بھارتی بیٹر ویرات کوہلی نے 14 سالہ شاندار ٹیسٹ کیرئیر کے بعد طویل فارمیٹ سے ریٹائرمنٹ کا اعلان کر دیا ہے۔ سوشل میڈیا پر جاری پیغام میں انہوں نے کہا:

"وائٹ جرسی میرے دل کے بہت قریب رہی، لیکن اب محسوس ہوتا ہے کہ رخصت ہونے کا وقت آ گیا ہے۔"

کوہلی نے اپنے کیرئیر میں 123 ٹیسٹ میچز کھیلے، جن میں 9230 رنز، 30 سنچریاں اور 31 نصف سنچریاں شامل ہیں۔ ان کا شمار اس دور کے عظیم ترین بیٹسمینوں میں کیا جاتا ہے جنہوں نے مشکل وقت میں ٹیم کو سنبھالا اور کئی تاریخی فتوحات میں مرکزی کردار ادا کیا۔

ان کی ریٹائرمنٹ نے شائقین کو حیران اور افسردہ کر دیا ہے، مگر دنیا بھر سے انہیں شاندار کیرئیر پر مبارکباد دی جا رہی ہے۔ ویرات کوہلی کا یہ فیصلہ نہ صرف بھارتی کرکٹ بلکہ بین الاقوامی ٹیسٹ کرکٹ کے لیے بھی ایک بڑا لمحہ ہے۔