حکومتی وزراء کی ایک بار پھر چیف الیکشن کمشنر پرتنقید

سماء نیوز  |  Sep 20, 2021

وزیر ریلوے اعظم سواتی نے چيف اليکشن کمشنر کو کھلا چيلنج دے ڈالا، بولے چند روز میں قانون بناکر دکھائیں گے، آپ کس کے کہنے پر کھلواڑ کررہے ہیں، آپ بڑے میاں کی جیب کی گھڑی اور ہاتھ کی چھڑی ہیں، الیکشن کمیشن اور آئین کا پاس نہ ہوتا تو کبھی آپ کی تقرری نہ ہوتی۔ بابر اعوان نے بڑا دعویٰ کرديا، کہا کہ اپوزیشن کی جانب سے پارلیمانی کمیٹی بنانے کا مطالبہ مان لیا گيا ہے۔

اسلام آباد میں وفاقی وزیر ریلوے اور مشیر پارلیمانی امور نے پریس کانفرنس کرتے ہوئے ایک بار پھر چیف الیکشن کمشنر سکندر سلطان راجا پر کڑی تنقید کی۔

اعظم سواتی کا کہنا تھا کہ چند دنوں میں قانون بناکر دکھائیں گے، آپ کس کے کہنے پر کھلواڑ کر رہے ہیں، آپ بڑے میاں کی جیب کی گھڑی اور ہاتھ کی چھڑی ہیں، الیکشن کمیشن اور آئین کا پاس نہ ہوتا تو کبھی آپ کی تقرری نہ ہوتی، کئی راز ہیں لیکن حلف لیا ہوا ہے بتا نہیں سکتا، آپ حکومت کا مقابلہ کرو گے تو ہم سیسہ پلائی دیوار بن کر کھڑے ہیں۔

بابر اعوان نے بتایا کہ حکومت اور حزب اختلاف مثبت بات چیت کے ٹریک پر رواں دواں ہیں۔ انہوں نے کہا کہ ہم ان سے پچھلے ہفتے ملے تھے، انہوں نے اعتماد سازی کیلئے ہمیں پارلیمان کی مشترکہ کمیٹی بنانے کا کہا، ہم اس کی تحریک لائیں گے اور کمیٹی بنے گی۔

ان کا کہنا تھا کہ اپوزیشن کو ہم آگے بڑھ کر اس کا حصہ بنا رہے ہیں لیکن یہ طے ہے کہ ایسا نہیں ہوگا ہم کچھ بھی نہ کریں۔

حکومتی نمائندوں کا کہنا تھا کہ الیکٹرانک ووٹنگ مشین کوئی نیا تصور نہیں، 2014ء سے 16 تک یہی اپوزیشن الیکشن کمیشن کیساتھ ملکر اس پر کام کرتی رہی، ایک بار قانون سازی مکمل ہوگئی تو پھر سب کو ماننا ہی پڑے گا۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More