مری کے ہوٹل میں تین سیاح پُراسرار طور پر ہلاک، تحقیقات جاری

اردو نیوز  |  Dec 03, 2022

پاکستان کے صوبہ پنجاب کے سیاحتی مقام مری میں پولیس کے مطابق تین سیاح پُراسرار طور پر ہلاک ہو گئے ہیں جبکہ ایک سیاح کو بے ہوشی کی حالت میں ہسپتال پہنچایا گیا ہے۔

مری پولیس کے مطابق ایکسپریس وے پر ڈنہ کے مقام پر نجی ہوٹل کے کمرے میں چار سیاح بے ہوش پائے جانے کی اطلاع موصول ہوئی۔

اطلاع پر پولیس اور امدادی کارکن موقع پر پہنچے۔ چاروں افراد کو ہسپتال منتقل کیا گیا جہاں پہنچ کر تین افراد دم توڑ گئے، جبکہ ایک بے ہوش ہے اور اس کی حالت غیر ہے۔  

مقامی پولیس کے مطابق ہلاک ہونے والے افراد کی شناخت 28 سالہ محمد اویس، 30 سالہ فیصل ایاز اور 29 سالہ محمد شاہ رخ کے نام سے ہوئی، جبکہ بے ہوش شخص کی شناخت محمد کے نام سے ہوئی۔ چاروں سیاحوں کا تعلق پنجاب کے مختلف علاقوں راولپنڈی، تریٹ اور دیگر علاقوں سے ہے۔ 

تھانہ پتریاٹہ کی پولیس نے واقعے کے حوالے سے تحقیقات شروع کر دی ہیں اور جائے وقوعہ سے شواہد اکھٹے کیے جارہے ہیں۔

پولیس کا کہنا ہے کہ تحقیقات کے لیے فرانزک ٹیموں کو بلا لیا گیا ہے جو موقع سے شواہد اکٹھے کریں گی اور لاشوں کے پوسٹ مارٹم اور دیگر فرانزک شواہد کی روشنی میں وجہ موت کا تعین ہو سکے گا۔  

دوسری جانب سی پی او سید شہزاد ندیم بخاری نے واقعے کا نوٹس لیتے ہوئے تحقیقات کر کے رپورٹ پیش کرنے کا حکم دیا۔ انہوں نے کہا ہے کہ میرٹ پر تحقیقات کرتے ہوئے قانون کے مطابق کارروائی کو یقینی بنایا جائے گا۔ 

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More