کیا پاکستان میں معاشی ایمرجنسی لگنے کا کوئی خدشہ ہے؟

اردو نیوز  |  Dec 06, 2022

پاکستان کی حکومت نے کہا ہے کہ ملک میں معاشی ایمرجنسی لگنے کی خبروں میں کوئی صداقت نہیں ہے اور حکومت نے اس حوالے ایسی کوئی منصوبہ بندی نہیں کی ہے۔

منگل کو خزانہ ڈویژن کی جانب سے جاری ہونے والی پریس ریلیز میں کہا گیا کہ ’حالیہ دنوں میں سوشل میڈیا پر معاشی ایمرجنسی کی تجویز کا جھوٹا پیغام گردش کر ر ہا ہے۔‘

’خزانہ ڈویژن ایسے پیغام کی سختی سے تردید کرتی ہے۔ معاشی ایمرجنسی لگانے کی کوئی منصوبہ بندی نہیں کی گئی ہے۔ بدقسمتی  سے اس پیغام کا مقصد ملکی معاشی حالات کے بارے میں بے یقینی پیدا کرنا ہے اور اسے ایسے لوگ پھیلا رہے ہیں جو پاکستان کی ترقی نہیں دیکھنا چاہتے۔‘

پریس ریلیز کے مطابق ’مشکل معاشی حالات میں اس طرح کے پیغامات پھیلانا ملکی مفاد کے خلاف ہے۔ پاکستان کی جبلی طاقت اور تنوع کو سامنے رکھتے ہوئے اس کو سری لنکا کے ساتھ ملانا بھی بالکل غیر مناسب ہے۔‘

’موجودہ مشکل معاشی حالات کی وجہ روس یوکرین جنگ، عالمی کساد بازاری، پالیسی ریٹس، کموڈٹی سپر سائیکل اور سیلاب ہے۔ حکومت ان عوامل پر قابو پانے کی پوری کوشش کر رہی ہے۔ حکومت وقت پر قرض کی ادائیگی کے ساتھ ساتھ آئی ایم ایف پروگرام کو مکمل کرنے کے لیے بھی پُرعزم ہے۔‘

مزید کہا گیا کہ ’ان معاشی حالات میں حکومت نے کابینہ کی منظوری سے کئی اقدامات کیے ہیں جن کا عوام کو علم ہے اور ان کا مقصد غیر ضروری اخراجات کم کرنا ہے۔‘

 خزانہ ڈویژن کے مطابق ’حکومت کی کوششوں سے آئی ایم ایف پروگرام اپنے ٹریک پر واپس آ گیا ہے اور نویں جائزے کے حوالے مذاکرات جاری ہیں۔‘

’حکومت کی کوششوں سے حالیہ مہینوں میں کرنٹ اکاؤنٹ خسارے میں کمی ہوئی ہے اور ایف بی آر ریونیو کے حصول میں بھی بہتری آئی ہے۔ ملکی معاشی حالات اب استحکام کی جانب بڑھ رہے ہیں۔‘

خزانہ ڈویژن کا کہنا ہے کہ ’لوگوں سے اپیل ہے کہ وہ معاشی بہتری اور استحکام میں حصہ ڈالیں اور ایسی افواہوں پر کان نہ دھریں جو ملکی مفاد کے خلاف ہیں۔‘

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More