آندھرا پردیش کے وزیر اعلیٰ چندرابابو نائیڈو نے اپنے انتخابی وعدے کی تکمیل کی طرف ایک اور قدم اٹھاتے ہوئے حج پر جانے والے مسلمانوں کو فی کس ایک لاکھ روپے مالی مدد فراہم کرنے کے عزم کا اعادہ کیا ہے۔
امراوتی میں اقلیتوں کی فلاح و بہبود کے حوالے سے ہونے والی ایک اہم میٹنگ کے دوران، نائیڈو نے اعلیٰ عہدیداروں کو ہدایت دی کہ وہ حج کے لیے روانہ ہونے والے ہر شخص کو ایک لاکھ روپے مالی معاونت فراہم کرنے کے وعدے کو عملی شکل دیں۔
مساجد کے امام اور مؤذن بھی مستفید ہوں گے
چندرابابو نائیڈو نے عہدیداروں کو مزید ہدایت دی کہ اماموں اور مؤذنوں کو ماہانہ اعزازیے کی فراہمی کو جلد از جلد یقینی بنایا جائے، جس کے مطابق امام کو 10,000 روپے اور مؤذن کو 5,000 روپے ماہانہ ملیں گے۔
وزیر اعلیٰ نے وقف بورڈ کی جائیدادوں کا ایک سال کے اندر سروے مکمل کرنے کی بھی ہدایت کی اور اقلیتی فلاح و بہبود کے لیے جاری تمام اسکیموں کا از سر نو جائزہ لینے کا حکم دیا تاکہ ان کو مزید بہتر اور مؤثر بنایا جا سکے۔
الیکشن کے وعدوں پر عمل کا عزم
نائیڈو نے عہدیداروں سے کہا کہ وہ ٹی ڈی پی کے سابقہ دور میں نافذ کی گئی اسکیموں اور اقلیتوں سے کیے گئے حالیہ وعدوں کا گہرائی سے مطالعہ کریں تاکہ ایک نیا لائحہ عمل تیار کیا جا سکے اور ان اسکیموں پر تیز تر عملدرآمد ممکن ہو۔