"قومیں اپنے مسائل مل جل کر حل کرتی ہیں، ہمیں تعاون اور افہام و تفہیم کے ساتھ مسائل کے حل پر توجہ دینی چاہیے۔ مختلف شہروں اور اُن کے کلچرز کے بارے میں مثبت مکالمے کی حوصلہ افزائی کرنا لوگوں کے درمیان اتحاد اور احترام کو فروغ دے سکتا ہے، اپنے درمیان اختلافات کا اعتراف کرتے ہوئے ہم اپنے مشترکہ چیلنجز سے نمٹنے کے لیے مل کر کام کر سکتے ہیں۔"
"اسموگ کے مسئلے پر بات کرنے سے زیادہ ضروری ہے کہ اس کے خاتمے کے عملی طریقے اپنائے جائیں۔ مہذب اقوام اتحاد و اتفاق سے مسائل کو حل کرتی ہیں۔"
"حکومت کا 10 سالہ اسموگ مٹیگیشن پروگرام قابلِ تعریف ہے۔ میں نے خود اس مسئلے سے نمٹنے کے لیے یہ عمل شروع کیا ہے کہ ہم ایک دوسرے کے گھروں میں مٹھائیاں اور کیک لے جانے کے بجائے پودے تحفے میں دیتے ہیں۔ اس طرح انڈور پلانٹس کا تحفہ نہ صرف گھروں کو سرسبز بنائے گا بلکہ فضا کی بہتری میں بھی مددگار ہوگا۔ اگر باہر جگہ نہیں ہے تو بالکونی یا چھت پر پودے لگائیں۔ ہم سب مل کر کام کریں تو بہتری آ سکتی ہے۔"
"اگر آپ سب کے پاس بھی اسموگ سے نجات کے لیے کوئی اچھوتا آئیڈیا ہو تو ضرور کمنٹ کریں۔"
پنجاب میں بڑھتی ہوئی فضائی آلودگی نے لاہوری عوام کی زندگیوں کو مشکل بنا دیا ہے۔ اسموگ کی شدت کے سبب شہر دنیا کے آلودہ ترین شہروں میں سرفہرست ہے۔
اداکار احسن خان نے اس سنگین مسئلے پر اپنی تشویش کا اظہار کرتے ہوئے انسٹاگرام پر ایک ویڈیو کے ذریعے حکومت کے اسموگ سے نمٹنے کے اقدامات کو سراہا۔ انہوں نے اس مسئلے کو کم کرنے کے لیے سب کو متحد ہو کر کام کرنے کی ضرورت پر زور دیا۔
احسن خان نے تجویز دی کہ ہم تحائف کے طور پر کیک اور مٹھائیاں لے جانے کے بجائے پودے تحفے میں دیں۔ اس طرح گھروں میں انڈور پلانٹس بڑھیں گے جو آلودگی کو کم کرنے میں مددگار ثابت ہوں گے۔ ان کا کہنا تھا کہ اگر ہر کوئی چھت یا بالکونی میں بھی پودے لگائے تو ماحول بہتر بنایا جا سکتا ہے۔
انہوں نے مزید کہا کہ اگر کسی کے پاس اسموگ کے خاتمے کے لیے مزید آئیڈیاز ہیں تو وہ انہیں ضرور شیئر کریں۔