انٹرنیشنل کرکٹ کونسل (آئی سی سی) نے پاکستان کے فاسٹ بولر شاہین شاہ آفریدی، بیٹر سعود شکیل اور متبادل کھلاڑی کامران غلام پر آئی سی سی کوڈ آف کنڈکٹ کی خلاف ورزی کرنے پر جرمانہ عائد کر دیا ہے۔
آئی سی سی کے مطابق، شاہین آفریدی پر میچ فیس کا 25 فیصد جرمانہ عائد کیا گیا، جبکہ سعود شکیل اور کامران غلام پر میچ فیس کا 10 فیصد جرمانہ لگایا گیا۔
شاہین آفریدی نے جان بوجھ کر جنوبی افریقا کے بیٹر میتھیو بریٹزکی کے راستے میں آ کر غیر مناسب طریقے سے باڈی کنٹیکٹ کیا اور اس کے ساتھ بحث بھی کی۔
اسی دوران سعود شکیل اور کامران غلام نے ٹیمبا باووما کے آؤٹ ہونے کے بعد ان کے قریب جا کر بے جا انداز میں سیلیبریٹ کیا، جس پر تینوں کھلاڑیوں کو ایک ایک ڈی میرٹ پوائنٹ بھی دیا گیا۔
یاد رہے کہ گزشتہ روز کراچی میں کھیلے گئے ایک سنسنی خیز میچ میں پاکستان نے جنوبی افریقا کا 353 رنز کا ہدف 4 وکٹوں کے نقصان پر پورا کیا اور تین ملکی سیریز کے فائنل کے لیے اپنی جگہ پکی کر لی۔