صوبہ خیبر پختونخوا کے ضلع شمالی وزیرستان کے علاقے میران شاہ میں شدت پسندوں سے مقابلے میں جان کی بازی ہارنے والے لیفٹیننٹ محمد حسن اشرف کی نماز جنازہ لاہور میں ادا کر دی گئی جس میں وزیراعظم شہباز شریف، اعلٰی حکومتی اور عسکری شخصیات نے شرکت کی۔پاکستانی فوج کے شعبہ تعلقات عامہ (آئی ایس پی آر) کی جانب سے جاری ہونے والے بیان کے مطابق سنیچر کو لاہور گیریژن میں ادا کی جانے والی نماز جنازہ میں وزیراعظم شہباز شریف، وزیر دفاع، وزیر اطلاعات اور سینیئر فوجی اور سول افسران سمیت لیفٹیننٹ محمد حسن اشرف کے رشتے داروں نے شرکت کی۔
وزیراعظم نے اپنے بیان میں کہا کہ ’یہ عظیم قربانی ہمارے بہادر بیٹوں کی غیرمتزلزل لگن اور بہادری کی ایک اور شاندار مثال ہے، جنہوں نے اپنے پیارے وطن کی خودمختاری اور دفاع کے لیے اپنی جانوں کا نذرانہ پیش کیا۔ پوری قوم اپنی مسلح افواج کے ساتھ غیر متزلزل یکجہتی کے لیے متحد ہے۔‘
قبل ازیں آئی ایس پی آر نے ایک بیان میں کہا تھا کہ شمالی وزیرستان کے علاقے میران شاہ میں ہونے والے ایک آپریشن میں چھ عسکریت پسند ہلاک ہوئے۔’فائرنگ کے تبادلے میں ایک فوجی افسر لیفٹیننٹ محمد حسن اشرف اور ان کے ساتھ تین اہلکار بھی جان سے گئے۔‘